احادیث مبارکہ کی روشنی میں رمضان المبارک و روزہ کی اہمیت و فضائل

---

صحیح بخاری و مسلم میں ابو ہریرہ رضی اللہ تعالیٰ عنہ سے مروی ہے حضور اقدس ﷺفرماتےہیں کہ:

’’ جب رمضان آتا ہے آسمان کے دروازے کھول دئیے جاتے ہیں ۔ ایک روایت میں ہے جنت کے دروازے کھول دئیے جاتے ہیں ۔ ایک روایت میں ہے کہ رحمت کے دروازے کھول دئیے جاتے ہیں اور جہنم کے دروازے بند کردئیے جاتے ہیں شیاطین زنجیروں میں جکڑ دئیے جاتے ہیں اور امام احمد و ترمذی و ابن ماجہ کی روایت میں ہے جب ماہ رمضان کی پہلی رات ہوتی ہے تو شیاطین اور سرکش جن قید کرلئے جاتے ہیں اور جہنم کے دروازے بند کردئیے جاتے ہیں تو ان میں سے کوئی دروازہ کھولا نہیں جاتا اور جنت کے دروازے کھول دئیے جاتے ہیں تو ان میں سے کوئی دروازہ بند نہیں کیا جاتا اور منادی پکارتا ہے ، اے خیر طلب کرنے والے متوجہ ہو اور اے شر کے چاہنے والے بازرہ اور کچھ لوگ جہنم سے آزاد ہوتے ہیں اور یہ ہر رات میں ہوتا ہے ‘‘۔

امام احمد و نسائی کی روایت انہی سے ہے کہ حضور اقدس صلی اللہ علیہ وسلم نے ارشاد فرمایا کہ:

’’رمضان آیا یہ برکت کا مہینہ ہے ، اللہ تالیٰ نے اس کے روزے فرض کئے ، اس میں آسمان کے دروازے کھول دئیے جاتے ہیں اور اس میں ایک رات ایسی ہے جو ہزار مہینوں سے بہتر ہے جو اس کی بھلائی سے محروم رہا وہ بیشک محروم ہے ‘‘۔

بیہقی شعب الایمان میں سلمان فارسی رضی اللہ تعالیٰ عنہ سے روایت کرتے ہیں کہ رسول اللہ ﷺنے شعبان کے آخر دن میں وعظ فرمایا:

’’اے لوگو! تمہارے پاس عظمت والا برکت والا مہینہ آیا ، وہ مہینہ جس میں ایک رات ہزار مہینوں سے بہتر ہے اس کے روزے اللہ تعالیٰ نے فرض کئے اور اس کی رات میں قیام (نماز پڑھنا) تطوع (یعنی سنت) جو اس میں نیکی کا کوئی کام کرے تو ایسا ہے جیسے اورکسی مہینے میں فرض ادا کیا اور اس میں جس نے فرض ادا کیا تو ایسا ہے جیسے اور دنوں میں ستر فرض ادا کئے ۔ یہ مہینہ صبر کا ہے اور صبر کا ثواب جنت ہے اور یہ مہینہ مساوات کا ہے اور اس مہینے میں مومن کا رزق بڑھایا جاتا ہے جو اس میں روزہ دار کو افطار کرائے اس کے گناہوں کے لئے مغفرت ہے اور اس کی گردن آگ سے آزاد کردی جائے گی اور اس افطار کرانے والے کو ویسا ہی ثواب ملے گا جیسا روزہ رکھنے والے کو ملے گا بغیر اس کے کہ اس کے اجر میں سے کچھ کم ہو ‘‘۔
ہم نے عرض کی :
’’ یا رسول اللہ ! ہم میں کا ہر شخص وہ چیز نہیں پاتا جس سے روزہ افطار کرائے ‘‘۔

حضور نے فرمایا:

’’اللہ تعالیٰ یہ ثواب اس شخص کو دے گا جو ایک گھونٹ دودھ یا فرمایا ایک گھونٹ پانی سے افطار کرائے اور جس نے روزہ دار کو پیٹ بھر کھانا کھلایا اس کو اللہ تعالیٰ میرے حوض سے پلائے گا کہ کبھی پیاسا نہ ہو گا یہاں تک کہ جنت میں داخل ہوجائے۔ یہ وہ مہینہ ہے کہ اس کا اول رحمت ہے اور اس کا اوسط مغفرت ہے اور اس کا آخر جہنم سے آزادی ہے جو اپنے غلام پر اس مہینے میں تخفیف کرے یعنی کام میں کمی کرے اللہ تعالیٰ اسے بخش دے گا اور جہنم سے آزاد فرمادے گا‘‘۔

امام احمد و حاکم اور طبرانی کبیر میں اور ابن ابی الدنیا اور بیہقی شعب الایمان میں عبداللہ بن عمرو رضی اللہ تعالیٰ عنہما سے راوی کہ رسول اللہﷺفرماتے ہیں :

’’روزہ اور قرآن بندہ کے لئے شفاعت کریں گے ۔ روزہ کہے گا، اے رب میں نے کھانے اور خواہشوں سے دن میں اسے روک دیا میری شفاعت اس کے حق میں قبول فرما۔ قرآن کہے گا، اے رب میں نے اسے رات میں سونے سے باز رکھا میری شفاعت اس کے بارے میں قبول کر۔ دونوں کی شفاعتیں قبول ہوں گے‘‘۔

طبرانی اوسط میں اور بیہقی ابن عمر رضی اللہ تعالیٰ عنہما سے راوی ہیںکہ رسول اللہ ﷺ نے فرمایا:

’’ اللہ عزو جل کے نزدیک اعمال سات قسم کے ہیں دو عمل واجب کرنے والے اور دو کا بدلاان کے برابر ہے اور ایک عمل کا بدلا دس گناہ اور ایک عمل کا معاوضہ سات سو ہے اور ایک وہ عمل ہے جس کا ثواب اللہ ہی جانے۔ وہ دو جو واجب کرنے والے ہیں ان میں سے ایک یہ کہ جو خدا سے اس حال میں ملے کہ خالص اسی کی عبادت کرتا تھا ، کسی کو اس کا شریک نہ کرتا تھا۔ اس کے لئے جنت واجب۔ دوسرا یہ کہ جو خدا سے اس حال میں ملے کہ اس نے شریک کیا ہے تو اس کے لئے جہنم واجب ہے اور جس نے برائی کی اس کو اسی قدر سزا دی جائے گی اور جس نے نیکی کا ارادہ کیا مگر عمل نہ کیا تو اس کو ایک نیکی کا بدلہ دیا جائے گا اور جس نے نیکی کی اسے دس گُنا ثواب ملے گا اور جس نے اللہ کی راہ میں خرچ کیا اس کو سات سو کا ثواب ملے گا ، ایک درہم سات سو درہم اور ایک دینار کا ثواب سات سو دینار اور روزہ اللہ کے لئے ہے اس کا ثواب اللہ عزوجل کے سوا کوئی نہیں جانتا‘‘۔

حاکم نے کعب ابن عجرہ رضی اللہ تعالیٰ عنہ سے روایت کی کہ رسول اللہ ﷺنے فرمایا:

’’سب لوگ منبر کے پاس ہوں‘‘۔

ہم حاضر ہوئے ، حضورﷺ منبر کے پہلے درجہ پر چڑھے، کہا:

’’آمین‘‘۔

دوسرے پر چڑھے، کہا:

’’آمین‘‘۔

تیسرے پر چڑھے، کہا:

’’آمین‘‘۔

جب منبر سے تشریف لائے ہم نے عرض کی:

’’آج ہم نے حضور صلی اللہ تعالیٰ علیہ وسلم سے ایسی بات سنی کہ کبھی نہ سنتے تھے، فرمایا:

’’جبرائیل علیہ السلام نے آکر عرض کی وہ شخص دور ہو جس نے رمضان پایا اور اپنی مغرفت نہ کرائی۔ میں نے کہا آمین۔ جب میں دوسرے درجہ پر چڑھا تو کہا وہ شخص دور ہو جس کے پاس میرا ذکر ہوا اور مجھ پر درود نہ بھیجے۔ میں نے کہا آمین۔ جب میں تیسرے درجے پر چڑھا کہا وہ شخص دور ہو جس کے ماں باپ دونوں یا ایک کو بڑھاپا آئے اور ان کی خدمت کرکے جنت میں نہ جائے ۔ میں نے کہا آمین۔

اسی کی مثل ابو ہریرہ و حسن بن مالک بن حویرث رضی اللہ تعالیٰ عنہم سے ابن حبان نے روایت کی۔

روزہ کے فقہی مسائل و احکام

---

روزے کے شرعی معنی: روزہ عرف شرع میں مسلمان کا عبادت کی نیت سے صبح صادق سے غروب آفتاب تک اپنے آپ کو قصداً کھانے پینے سے جماع سے باز رکھنا عورت کا حیض و نفاس سے خالی ہوناروزہ رکھنے کیلئے شرط ہے (کتب عامہ )

روزے کے درجے:روزے کے تین درجے ہیں ایک عام لوگوں کا روزہ کہ یہی پیٹ اور شرمگاہ کو جماع سے باز رکھنا۔ دوسرا خواص کا روزہ کہ ان کے علاوہ کان، آنکھ، زبان، ہاتھ پائوں اور تمام اعضا ء کو گناہ سے باز رکھنا۔ تیسرا خاص الخاص کا کہ جمیع ما سوی اللہ سے اپنے کو بالکل جدا کرکے صرف اس کی طرف متوجہ رہنا(جوہرہ، نیرہ)

روزے کی نیت کے مسائل:

مسئلہ: ادائے روزہ رمضان اور معین منت اور نفل کے روزوں کے لئے نیت کا وقت غروب آفتاب سے نصف النہار شرعی تک ہے اس وقت میں جب نیت کرلے یہ روزے ہوجائیں گے نصف النہار شرعی نیت کا وقت نہیں بلکہ اس سے بیشتر نیت ہوجانا ضروری ہے اور اگر خاص اس وقت یعنی جس وقت آفتاب خط نصف النہار شرعی پر پہنچ گیا نیت کی تو روزہ نہ ہوا۔

نیت کس طرح کریں ؟

مسئلہ: نیت دل کے ارادہ کا نام ہے زبان سے کہنا شرط نہیں مگر زبان سے کہہ لینا مستحب ہے اگر رات میں نیت کرلے تو یوں کہے :

نَوَیْتُ اَنْ اَصُوْمَ غَداً لِلّٰہِ تَعَالیٰ مِنْ فَرضِ رَمْضَانَ ھٰذَا 

یعنی میں نے نیت کی اللہ عزوجل کے لئے اس رمضان کا روزہ کل رکھوں گا اور دن میں نیت کرے تو یوں کہے:

نَوَیْتُ اَنْ اَصُوْمَ ھٰذَا الْیَومَ لِلّٰہِ تَعَالٰی مِنْ فَرضِ رَمْضَانَ

میں نے نیت کی کہ اللہ تعالیٰ کے لئے آج رمضان کا فرض روزہ رکھوں گا اور اگر تبرک و طلب توفیق کے لئے نیت کے الفاظ میں ان شاء اللہ تعالیٰ بھی ملا لیا تو حرج نہیں اور اگر پکا ارادہ نہ ہو نیت کے الفاظ میں ان شاء اللہ تعالیٰ بھی ملا لیا تو حرج نہیں اور اگر پکا ارادہ نہ ہو نیت کے الفاظ میں ان شاء اللہ تعالیٰ کو بھی ملا لیا تو حرج نہیں اور اگر پکا ارادہ نہ ہو تذبذب ہو تو نیت ہی کہاں ہوئی (جوہرہ، نیرہ)

روزہ کی نیت دن میں کس طرح کریں:

مسئلہ: دن میں نیت کرے تو ضرور ہے کہ یہ نیت کرے کہ میں صبح صادق سے روزہ دار ہوں اور اگر یہ نیت ہے کہ اب سے روزہ دار ہوں صبح سے نہیں تو روزہ نہیں ہوا (جوہرہ، رد المختار)

مسئلہ: اگرچہ ان تین قسم کے روزوں کی نیت دن میں بھی ہوسکتی ہے مگر رات میں نیت کرلینا مستحب ہے (جوہرہ )

روزہ کی نیت میں شرط لگانا کیسا؟

مسئلہ: یوں نیت کی کہ کل کہیں دعوت ہوئی تو روزہ نہیں اور نہ ہوئی تو روزہ ہے، یہ نیت صحیح نہیں۔ بہرحال وہ روزہ دار نہیں ۔

مسئلہ: رمضان کے دن میں نہ روزہ کی نیت کی ہے نہ یہ کہ روزہ نہیں اگرچہ معلوم ہے کہ یہ مہینہ رمضان کا ہے تو روزہ نہ ہوا (عالمگیری)

رات میں روزہ کی نیت کرنے کے بعد کھا پی لیا تو کیا حکم ہے؟

مسئلہ: رات میں نیت کی پھر اس کے بعد رات ہی میں کھایا پیا تو نیت جاتی نہ رہی وہی پہلی ہی کافی ہے پھر سے نیت کرنا ضروری نہیں۔ (جوہرہ)

کس صورت میں دن میں روزہ کی نیت درست نہیں؟

مسئلہ: دن میں وہ نیت کام کی ہے کہ صبح صادق سے نیت کرتے وقت تک روزہ کے خلاف کوئی امر نہ پایا گیا ہو۔ لہٰذا اگر صبح صادق کے بعد بھول کر بھی کھا پی لیا ہو یا جماع کرلیا تو اب نیت نہیں ہوسکتی (جوہرہ ) مگر معتمد یہ ہے کہ بھولنے کی حالت میں اب بھی نیت صحیح ہے (رد المختار)

کیا روزہ توڑنے کی نیت کرنے سے روزہ ٹوٹ جاتا ہے ؟

مسئلہ: جس طرح نماز میں کلام کی نیت کی مگر بات نہ کی تو نماز فاسد نہ ہوگی یونہی روزہ میں توڑنے کی نیت سے روزہ نہیں ٹوٹے گا جب تک توڑنے والی چیز نہ کرے(جوہرہ)

رات میں روزہ کی نیت کرلینے کے بعد پکا ارادہ کر لیا کہ نہیں رکھے گا تو پھر کیا دوبارہ نیت کرے؟

مسئلہ: اگر رات میں روزہ کی نیت کی پھر پکا ارادہ کرلیا کہ نہیں رکھے گا تو وہ نیت جاتی رہی، اگر نئی نیت نہ کی اور دن بھر بھوکا پیاسا رہا اور جماع سے بچا تو روزہ نہ ہوا(درمختار، رد المختار)

کیا سحری کھانا بھی نیت ہے؟

مسئلہ: سحری کھانا بھی نیت ہے خواہ رمضان کے روزے کے لئے ہو یا کسی اور روزہ کے لئے مگر جب سحری کھاتے وقت یہ ارادہ ہے کہ صبح کو روزہ نہ ہو گا تو یہ سحری کھانا نیت نہیں (جوہرہ، رد المختار)

کیا رمضان کے ہر روزے کی نیت ضروری ہے؟

مسئلہ: رمضان کے ہر روزہ کے لئے نئی نیت کی ضرورت ہے پہلی یا کسی تاریخ میں پورے رمضان کے روزے کی نیت کرلی تو یہ نیت صرف اسی دن کے حق میں ہے باقی دنوں کے لئے نہیں (جوہرہ)

ان چیزوں کا بیان جن سے روزہ نہیں ٹوٹتا

---

صحیح بخاری و صحیح مسلم میں ابوہریرہ رضی اللہ تعالیٰ عنہ سے مروی ہے کہ رسول اللہ صلی اللہ تعالیٰ علیہ وسلم فرماتے ہیں جس روزے دار نے بھول کر کھایا پیا وہ اپنے روزے کو پورا کرے کہ اللہ تعالیٰ نے اسے کھلایا اور پلایا۔

ابو داؤد و ترمذی و ابن ماجہ و دارمی ابو ہریرہ رضی اللہ تعالیٰ عنہ سے راوی ہیں کہ رسول اللہ صلی اللہ تعالیٰ علیہ وسلم نے فرمایا جس پر قے نے غلبہ کیا اس پر قضا نہیں اور جس نے قصداً قے کی اس پر روزہ کی قضا ہے

ترمذی انس رضی اللہ تعالیٰ عنہ سے راوی کہ ایک شخص نے خدمت اقدس میں حاضر ہو کر عرض کی میری آنکھ میں مرض ہے کیا روزے کی حالت میں سرمہ لگاؤں۔ فرمایا ہاں۔

ترمذی ابو سعید رضی اللہ تعالیٰ عنہ سے راوی کہ رسول اللہ صلی اللہ تعالیٰ علیہ وسلم نے فرمایا تین چیزیں روزہ نہیں توڑتیں، پچھنا، قے اور احتلام۔

کیا بھول کر کھانے پینے سے روزہ ٹوٹ جاتا ہے؟

مسئلہ: بھول کر کھایا یا پیا یا جماع کیا ، روزہ فاسد نہ ہوا خواہ وہ روزہ فرض ہو یا نفل اور روزہ کی نیت سے پہلے یہ چیزیں پائی گئیں یا بعد میں مگر جب یاد دلانے پر بھی یاد نہ آیا کہ روزے دار ہے تو اب فاسد ہوجائے گا۔ بشرطیکہ یاد دلانے کے بعد یہ افعال واقع ہوئے ہوں مگر اس صورت میں کفارہ لازم نہیں (در مختار، رد المحتار)

کن صورتوں میں روزہ دار کو اگر کھاتے پیتے دیکھے تو یاد دلانا واجب ہے؟

مسئلہ: کسی روزے دار کو ان افعال میں دیکھے تو یاد دلانا واجب ہے یاد نہ دلایا تو گناہگار ہوگا مگر جب کہ روزہ دار بہت کمزور ہو کہ یاد دلائے گا تو وہ کھانا چھوڑ دے گا اور کمزوری بڑھ جائے گی کہ روزہ رکھنا دشوار ہو گا اور کھائے گا تو روزہ بھی اچھی طرح پورا کرلے گا اور دیگر عبادتیں بھی بخوبی ادا کرلے گا تو اس صورت میں یاد نہ دلانا بہتر ہے۔ بعض مشائخ نے کہا جوان کو دیکھے تو یاد دلادے اور بوڑھے کو دیکھے تو یاد نہ دلانے میں کوئی حرج نہیں، مگر یہ حکم اکثر کے لحاظ سے ہے کہ جوان اکثر قوی ہوتے ہیں اور بوڑھے اکثر کمزور اور اصل حکم یہ ہے کہ جوانی اور بڑھاپے کو کوئی دخل نہیں بلکہ قوت و ضعف کا لحاظ ہے لہٰذا اگر جوان اس قدر کمزور ہو تو یاد نہ دلانے میں حرج نہیںاور بوڑھا قوی ہو تو یاد دلانا واجب ہے (رد المحتار)

کیا مکھی، غبار، دھواں حلق میں جانے سے روزہ ٹوٹ جاتا ہے؟

مسئلہ: مکھی یا دھواں یا غبار حلق میں جانے سے روزہ نہیں ٹوٹتا خواہ وہ غبار آئے کا ہو کہ چکی پیسنے یا آٹا چھاننے سے اڑتا ہے یا غلہ کا غبار ہویا ہوا سے خاک اڑی یا جانوروں کے کھر یا ٹاپ سے غبار اڑ کر حلق میں پہنچا اگرچہ روزہ دار ہونا یاد تھا اور اگر خود قصداً دھواں پہنچایا تو فاسد ہو گیا جبکہ روزہ دار ہونا یاد ہو خواہ وہ کسی چیز کا دھواں ہو اور کسی طرح پہنچایا ہو ۔ یہاں تک کہ اگر کسی بتی وغیرہ خوشبو سلگتی تھی اس نے منہ قریب کرکے دھوئیں کو ناک سے کھینچا روزہ جاتا رہا۔ یوں ہی حقہ پینے سے بھی روزہ ٹوٹ جاتا ہے اگر روزہ یاد ہو اور حقہ پینے والا اگر پئے گا تو کفارہ بھی لازم آئے گا۔(در مختار، رد المحتار، وغیرہ ہما)

غسل و وضو میں کچھ تری جو منہ میں باقی رہ گئی تھوک کے ساتھ نگل گیا تو اب کیا کریں؟

مسئلہ: غسل کیا اور پانی کی خنکی اندر محسوس ہوئی یا کلی کی اور پانی بالکل پھینک دیا یا صرف کچھ تری منہ میں باقی رہ گئی تھی تھوک کے ساتھ اسے نگل گیا یا کان میں پانی چلا گیا یا تنکے سے کان کھجایا اور اس پر کان کا میل لگ گیا پھر وہی میل لگا ہوا تنکا کان میں ڈالا اگرچہ چند بار کیا ہو یا دانت یا منہ میں خفیف چیز بے معلوم سی رہ گئی کہ لعاب کے ساتھ خود ہی اتر جائے گی اور وہ اتر گئی یا دانتو ں سے خون نکل کر حلق تک پہنچا مگر حلق سے نیچے نہ اترا تو ان سب صورتوں میں روزہ نہ گیا (درمختار، فتح القدیر)

مسئلہ: بات کرنے میں تھوک سے ہونٹ تر ہوگئے اور اس کی تری حلق سے نیچے اتر گئی یا منہ سے رال ٹپکی مگر تار ٹوٹا نہ تھا کہ اسے حلق سے نیچے اتار لیا یا ناک میں رینٹھ آگئی بلکہ ناک سے باہر آگئی مگر منقطع نہ ہوئی تھی کہ اسے نگل گیا یا کھنکار منہ میں آیا اور کھا گیا اگرچہ کتنا ہی ہو روز نہ جائے گا مگر ان باتوں سے احتیاط کرنی چاہیے۔ (عالمگیری، در مختار، رد المحتار)

کیا مکھی حلق میں چلے جانے سے روزہ ٹوٹ جاتا ہے؟

مسئلہ: مکھی حلق میں چلی گئی روزہ نہ گیا اور قصداً نگلی تو جاتا رہا۔

کیا بھول کر کھانے سے روزہ ٹوٹ جاتا ہے؟

مسئلہ: بھولے سے کھانا کھا رہا تھا یاد آتے ہی فوراً لقمہ پھینک دیا یا صبح صادق سے پہلے کھارہا تھا اور صبح ہوتے ہی اگل دیا روزہ نہ گیا اور نگل گیا تو دونوں صورتوں میں جاتا رہا۔

کیا احتلام یا غیبت سے روزہ ٹوٹ جاتا ہے؟

مسئلہ: احتلام ہو یا غیبت کی ہو، تو روزہ نہ گیا اگرچہ غیبت بہت سخت کبیرہ گناہ ہے قرآن مجید میں غیبت کرنے کی نسبت فرمایا جیسے اپنے مردہ بھائی کا گوشت کھانا (۴۹:۱۲) اور حدیث میں فرمایا غیبت زنا سے بھی سخت تر ہے اگرچہ غیبت کی وجہ سے روزہ کی نورانیت جاتی رہتی ہے (در مختار وغیرہ)

کیا جنابت کی حالت میں روزہ ٹوٹ جاتا ہے؟

مسئلہ: جنابت کی حالت میں صبح کی بلکہ اگر سارے دن جنب رہا روزہ نہ گیا مگر اتنی دیر تک قصداً غسل نہ کرنا کہ نماز قضا ہوجائے گناہ و حرام ہے حدیث میں فرمایا کہ جنب جس گھر میں ہوتا ہے اس میں رحمت کے فرشتے نہیں آتے (در مختار وغیرہ)

اگر تل یا تل کے برابر کوئی شے حلق سے اتر جائے تو کیا روزہ جاتا رہا؟

مسئلہ: تل یا تل کے برابر کوئی چیز چبائی اور تھوک کے ساتھ حلق میں اتر گئی تو روزہ نہ گیا مگر جب کہ اس کا مزہ حلق میں محسوس ہوتا ہو تو روزہ جاتا رہا(فتح القدیر)

روزہ توڑنے والی چیزوں کا بیان

---

بخاری و احمد و ابو دائود و ترمذی و ابن اجہ و دارمی ابو ہریرہ رضی اللہ تعالیٰ عنہ سے راوی ہیں کہ حضور اقدس صلی اللہ تعالیٰ علیہ وسلم فرماتے ہیں جس نے رمضان کے ایک دن کا روزہ بغیر رخصت و بغیر مرض افطار کیا(یعنی چھوڑدیا) تو زمانہ بھر کا روزہ اس کی قضا نہیں ہوسکتا۔ اگرچہ رکھ بھی لے یعنی وہ فضیلت جو رمضان میں رکھنے کی تھی کسی طرح حاصل نہیں کرسکتا تو جب روزہ نہ رکھنے میں یہ سخت وعید ہے تورکھ کر توڑ دینا تو اس سے سخت تر ہے۔

مسئلہ: کھانے پینے جماع کرنے سے روزہ جاتا رہتا ہے جبکہ روزہ دار ہونا یاد ہو۔

کیا سگریٹ پینے اور پان کھانے سے روزہ جاتا رہا؟

مسئلہ: حقہ، سگار، سگریٹ وغیرہ پینے سے روزہ جاتا رہتا ہے اگرچہ اپنے خیال میں حلق تک دھواں پہنچاتا ہوں بلکہ پان یا صرف تمباکو کو کھانے سے بھی روزہ جاتا رہے گا اگرچہ پیک تھوک دی ہو کہ اس کے باریک اجزاء ضرور حلق میں پہنچتے ہیں۔

روزہ ٹوٹنے کی صورتیں:

مسئلہ: شکر وغیرہ ایسی چیزیں جو منہ میں رکھنے سے گھل جاتی ہیں، منہ میں رکھی اور تھوک نگل گیا روزہ جاتا رہا یونہی دانتوں کے درمیان کوئی چیز چنے کے برابر یا زیادہ تھی اسے کھا گیا یا کم ہی تھی مگر منہ سے نکال کر پھر کھالی یا دانتوں سے خون نکل کر حلق سے نیچے اترا اور خون تھوک سے زیادہ برابر یا کم تھا مگر اس کا مزہ حلق میں محسوس ہوا تو ان سب صورتوں میں روزہ جاتا رہا اور اگر کم تھا اور مزہ بھی محسوس نہ ہوا تو نہیں (در مختار)۔

روزہ میں دانت اکھڑوایا یا ٹوٹ گیا تو کیا حکم ہے؟

مسئلہ: روزہ میں دانت اکھڑوایا اور خون نکل کر حلق سے نیچے اترا اگر چہ سوتے میں ایسا ہوا تو اس روزہ کی قضا واجب ہے (رد المختار)

دماغ کے زخم میں دوا لگانا کیسا ؟

مسئلہ: دماغ یا شکم کی جھلی تک زخم ہے اس میں دوا ڈالی اگر دماغ یا شکم تک پہنچ گئی روزہ جاتا رہا، خواہ دوا تر ہو یاخشک اور اگر معلوم نہ ہو کہ دماغ یا شکم تک پہنچی یا نہیں اور دواتر تھی جب بھی جاتا رہا اور خشک تھی تو نہیں (عالمگیری)

کان میں تیل ڈالا یا چلا گیا تو کیا روزہ جاتا رہا؟

مسئلہ: حقنہ لیا یا نتھنوں سے دوا چڑھائی یا کان میں تیل ڈالا یا تیل چلا گیا روزہ جاتا رہااور پانی کان میں چلا گیا یا ڈال تو نہیں (عالمگیری)

اگر کلی کرتے وقت پانی حلق سے نیچے اتر جائے تو کیا حکم ہے ؟

مسئلہ: کلی کررہا تھا بلا قصد پانی حلق سے نیچے اتر گیا یا ناک میں پانی چڑھایا اور دماغ کو چڑھ گیا روزہ جاتا رہا ، مگر جب کہ روزہ ہونا بھول گیا ہو تو نہ ٹوٹے گا اگرچہ قصداً ہو یونہی کسی نے روزے دار کی طرف کوئی چیز پھینکی وہ اس کے حلق میں چلی گئی روزہ جاتا رہا (عالمگیری)

روزے میں سوتے میں کھانے پینے کا کیا حکم ہیے؟

مسئلہ: سوتے میں پانی پی لیا یا کچھ کھالیا یا منہ کھولا تھا اور پانی کا قطرہ حلق میں چلا گیا روزہ جاتا رہا ۔ (عالمگیری)

مسئلہ: دوسرے کا تھوک نگل گیا یااپنا ہی تھوک ہاتھ پر لے کر نگل گیا روزہ جاتا رہا۔(عالمگیری)

منہ میں رنگین ڈورا رکھنا کیسا ہے؟

مسئلہ: منہ میں رنگین ڈورا رکھا جس سے تھوک رنگین ہو گیا پھر تھوک نگل گیا روزہ جاتا رہا۔ (عالمگیری)

مسئلہ: ڈورا بٹا اسے تر کرنے کے لئے منہ پر گزارا پھر دوبارہ وسہ بارہ یونہی کیا روزہ نہ جائے گا مگر جب کہ ڈورے سے کچھ رطوبت جدا ہو کر منہ میں رہی اور تھوک نگل گیا روزہ جاتا رہا۔ (جوہرہ)

اگر آنسو منہ میں چلا گیا تو کیا حکم ہے ؟

مسئلہ: آنسو منہ میں چلا گیا اور نگل گیا اگر قطرہ دو قطرہ ہے تو روزہ نہ گیا اور زیادہ تھا کہ اس کی نمکینی پورے منہ میں محسوس ہوئی تو جاتا رہا پسینہ کا بھی یہی حکم ہے۔ (عالمگیری)

روزہ میں عورت کا بوسہ لیا، چھوا، مباشرت کی یا گلے لگایا تو اس کا کیا حکم ہے؟

مسئلہ: عورت کا بوسہ لیا یا چھوا یا مباثرت کی یا گلے لگایا اور انزال ہو گیا تو روزہ جاتا رہا اور عورت نے مرد کو چھوا اور مرد کو انزال ہوگیا تو روزہ نہ گیا۔ عورت کو کپڑے کے اوپر سے چھوا اور کپڑا اتنا دبیز ہے کہ بدن کی گرمی محسوس نہیں ہوئی تو فاسد نہ ہوا اگرچہ انزال ہوگیا۔ (عالمگیری)

اگر روزے میں قے کردی تو کیا حکم ہے؟

مسئلہ: قصداً منہ بھر قے کی اور روزہ دار ہونا یاد ہے تو مطلقاً روزہ جاتا رہا اور اس سے کم کی تو نہیں اور بلا اختیار قے ہوگئی تو بھر منہ ہے یا نہیں اور بہر تقدیر وہ لوٹ کر حلق میں چلی گئی یا اس نے خود لوٹائی یا نہ لوٹائی تو اگر بھر منہ نہ ہو تو روزہ نہ گیا اگرچہ لوٹ گئی یا اس نے خود سے لوٹائی اور منہ بھر ہے اور اس نے لوٹائی اگرچہ اس میں سے صرف چنے برابر حلق سے اتری تو روزہ جاتا رہا ورنہ نہیں (در مختار وغیرہ)

مسئلہ: قے کے یہ احکام اس وقت ہیں کہ قے میں کھانا آئے یا صفراء یا خون اور بلغم آیا تو مطلقاً روزہ نہ ٹوٹا (عالمگیری)

رمضان میں بلا عذر جو شخص اعلانیہ کھائے تو اس کا کیا حکم ہے؟

مسئلہ: رمضان میں بلا عذر جو شخص علانیہ قصداً کھائے تو حکم ہے کہ حکومت وقت اسے قتل کردے۔
ان صورتوں کا بیان جن میں صرف قضا لازم ہے

اگر معلوم نہ ہو کہ صبح ہوچکی ہے؟

مسئلہ: یہ گمان تھا کہ صبح نہیں ہوئی اور کھایا پیایا جماع کیا بعد کو معلوم ہوا کہ صبح ہوچکی تھی یا کھانے پینے پر مجبور کیا گیا یعنی اکراہ شرعی پایا گیا اگرچہ اپنے ہاتھ سے کھایا ہو تو صرف قضا لازم ہے یعنی اس روزے کے بدلے میں ایک روزہ رکھنا پڑے گا۔ (درمختار)

اگر بھول کر کھانے پینے، جماع کرنے کے بعد گمان کیا کہ اب روزہ جاتا رہا اور قصداً کھا پی لیا تو کیا حکم ہے؟

مسئلہ: بھول کر کھایا پیایا جماع کیا تھا یا نظر کرنے سے انزال ہوا تھا یا احتلام ہوا یا قے ہوئی اور ان سب صورتوں میں یہ گمان کیا کہ روزہ جاتا رہا اب قصداً کھالیا تو صرف قضا فرض ہے۔ (درمختار)

قضا روزے کی مختلف صورتیں:

مسئلہ: کان میں تیل ٹپکا یا یا پیٹ یا دماغ کی جھلی تک زخم تھا، اس میں دوا ڈالی کہ پیٹ یا دماغ تک پہنچ گئی یا حقنہ لیا یا ناک سے دوا چڑھائی یا پتھر ، کنکر، مٹی روئی، کاغذ، گھاس وغیرہ یا ایسی چیز کھائی جس سے لوگ گھن کرتے ہیں یا رمضان میں بلا نیت روزہ کی طرح رہا یا صبح کو نیت نہیں کی تھی دن میں زوال سے پیشتر نیت کی اور بعد نیت کھالیا یا روزہ کی نیت تھی مگر روزہ رمضان کی نیت نہ تھی اس کے حلق میں بارش کی بوند یا اولا چلا گیا بہت سا آنسو یا پسینہ چلا گیا یا یہ گمان کرکے کہ رات ہے اور سحری کھالی یا رات ہونے میں شک تھا اور سحری کھالی حالانکہ صبح ہوچکی تھی۔ یا یہ گمان کرکے کہ آفتاب ڈوب گیا ہے افطار کرلیا حالانکہ ڈوبا نہ تھا یا دو شخصوں نے شہادت دی کہ آفتاب ڈوب گیا اور دو نے شہادت دی کہ دن ہے اور اس نے روزہ افطار کرلیا بعد کو معلوم ہوا کہ غروب نہیں ہوا تھا ان سب صورتوں میں صرف قضا لازم ہے کفارہ نہیں۔ (در مختار)

اگر دس سال کا بچہ روزہ رکھ کر توڑ د ے تو کیا حکم ہے؟

مسئلہ: بچہ کی عمر دس سال کی ہوجائے اور اس میں روزہ رکھنے کی طاقت ہو تو اس سے روزہ رکھوایا جائے نہ رکھے تو مار کر رکھوائیں اگر پوری طاقت دیکھی جائے اور رکھ کر توڑ دیا تو قضا کا حکم نہ دیں گے اور نماز توڑے تو پھر پڑھوائیں (رد المحتار)

میت کے قضا روزوں کا کیا حکم ہے؟

مسئلہ: میت کے روزے قضا ہوگئے تھے تو اس کا ولی اس کی طرف سے فدیہ ادا کرے۔ یعنی جب کہ وصیت کی اور مال چھوڑا ہو ورنہ ولی پر ضروری نہیں ہاں اگرکردے تو بہتر ہے۔

ان صورتوں کا بیان جن میں کفارہ لازم ہے

---

مسئلہ: رمضان میں روزہ دار مکلف مقیم نے ادائے روزہ رمضان کی نیت سے روزہ رکھا پھر کوئی غذا یا دوا کھائی یا پانی پیا یا کوئی چیز لذت کے لئے کھائی یا پی یا کوئی ایسا فعل کیا جس سے افطار کا گمان نہ ہوتا ہو اور اس نے گمان کرلیا کہ روزہ جاتا رہا پھر قصداً کھا پی لیا مثلاً سنگی (خون نکلوانا) یا پچھنا (نشتر لگوانا) لیا یا سرمہ لگایایا عورت کو چھوا یا بوسہ لیا یا ساتھ لٹایا یا مباشرت فاحشہ کی مگر ان سب صورتوں میں انزال نہ ہوا اب ان افعال کے بعد قصداً کھالیا تو ان سب صورتوں میں روزہ کی قضا اور کفارہ دونوں لازم ہیں اور اگر ان صورتوں میں کہ افطار کا گمان نہ تھا اور اس نے گمان کرلیا اگر کسی مفتی نے فتویٰ دے دیا تھا کہ روزہ جاتا رہا اور وہ مفتی ایسا ہو کہ اہل شہر کا اس پر اعتماد ہو ۔ اس کے فتویٰ دینے پر اس نے قصداً کھالیا یا اس نے کوئی حدیث سنی تھی جس کے صحیح معنی نہ سمجھ سکا اور اس غلط معنی کے لحاظ سے جان لیا کہ روزہ جاتا رہا اور قصداً کھالیا تو اب کفارہ لازم نہیں اگرچہ مفتی نے غلط فتویٰ دیا یا جو حدیث اس نے سنی وہ ثابت نہ ہو( درمختار وغیرہ)

مسئلہ: کفارہ لازم ہونے کے لئے یہ بھی ضروری ہے کہ روزہ توڑنے کے بعد کوئی ایسا امر واقع نہ ہوا جو روزہ کے منافی ہو یا بغیر اختیار ایسا امر نہ پایا گیا ہوجس کی وجہ سے روزہ افطار کرنے کی رخصت ہوتی مثلاً عورت کو اسی دن میں حیض یا نفاس آگیا یا روزہ توڑنے کے بعد اسی دن میں ایسا بیمار ہوگیا جس میں روزہ نہ رکھنے کی اجازت ہے تو کفارہ ساقط ہے اور سفر سے ساقط نہ ہوگا کہ یہ اختیاری امر ہے یونہی اگر اپنے کو زخمی کرلیا اور حالت یہ ہوگئی کہ روزہ نہیںرکھ سکتا کفارہ ساقط نہ ہوگا۔ (عالمگیری)

مسئلہ: کفارہ واجب ہونے کے لئے پیٹ بھر کھانا ضروری نہیں تھوڑا کھانے سے بھی واجب ہوجائے گا(جوہرہ)

مسئلہ: تیل لگایا یا غیبت کی پھر یہ گمان کرلیا کہ روزہ جاتا رہا یا کسی عالم نے ہی روزہ جانے کا فتویٰ دے دیا اس نے کھا پی لیا جب بھی کفارہ لازم ہے۔ (درمختار)

مسئلہ: قے آئی یا بھول کر کھایا یا پیا یا جماع کیا اور ان سب صورتوں میں اسے معلوم تھا کہ روزہ نہ گیا پھر اس کے بعد کھالیا تو کفارہ لازم نہیں اور اگر احتلام ہوا اور اسے معلوم تھا کہ روزہ نہ گیا،پھر کھالیا تو کفارہ لاز ہے۔ (رد المختار )

روزہ توڑنے کا کفارہ کیا ہے؟

مسئلہ: روزہ توڑنے کا کفارہ یہ ہے کہ ممکن ہو تو ایک رقبہ یعنی باندی یا غلام آزاد کردے اور یہ نہ کرسکے مثلاً اس کے پاس نہ لونڈی غلام ہے نہ اتنا مال کہ خریدے یا مال تو ہے مگر رقبہ میسر نہیں جیسے آج کل ہندوستان و پاکستان میں تو پے درپے ساٹھ روزے رکھے یہ بھی نہ کرسکے تو ساٹھ مساکین کو بھر بھر پیٹ دونوں وقت کھلائے اور روزے کی صورت میں اگر درمیان میں ایک دن کا بھی چھوٹ گیا تو ابسے ساٹھ روزے رکھے پہلے کے روزے محبوب نہ ہوں گے اگرچہ انسٹھ رکھ لئے تھے اگرچہ بیماری وغیرہ کسی عذر کے سبب چھوٹا ہو مگر عورت کو حیض آجائے تو حیض کی وہ سے جتنے ناغے ہوئے یہ ناغے شمار نہیں کئے جائیں گے یعنی پہلے کے روزے اور حیض کے بعد والے دونوں مل کر ساٹھ ہوجانے سے کفارہ ادا ہوجائے گا۔ (کتب کثیرہ)

مسئلہ: اگر دو روزے توڑے تو دونوں کے لئے دو کفارے دے اگرچہ پہلے کا ابھی کفارہ ادا نہ کیا ہو (رد المختار) یعنی جبکہ دونوں دو رمضان کے ہوں اور اگر دونوں روزے ایک ہی رمضان کے ہوں اور پہلے کا کفارہ ادا نہ کیا ہو تو ایک ہی کفارہ دونوں کے لئے کافی ہے۔

روزے کے مکروہات کا بیان

---

بخاری و ابو دائود و ترمذی و نسائی و ابن ماجہ ابو ہریرہ سے روایت کرتے ہیں کہ رسول اللہ صلی اللہ تعالیٰ علیہ وسلم نے فرمایا جو بری بات کہنا اور اس پر عمل کرنا نہ چھوڑے تو اللہ تعالیٰ کو اس کی کچھ حاجت نہیں کہ اس نے کھانا پینا چھوڑ دیا ہے اور اسی کے مثل طبرانی نے انس رضی اللہ تعالیٰ عنہ سے روایت کی۔

ابن ماجہ ونسائی و ابن خزیمہ و حاکم و بیقہی و دارمی ابو ہریرہ سے راوی کہ رسول اللہ صلی اللہ تعالیٰ علیہ وسلم نے فرمایا بہت سے روزے دار ایسے ہیں کہ انہیں روزے سے سوا پیاس کے کچھ حاصل نہیں اور بہت سے رات میں قیام کرنے والے ایسے ہیں کہ انہیں جاگنے کے سوا کچھ حاصل نہیں اور اسی کے مثل طبرانی نے ابن عمر و رضی اللہ تعالیٰ عنہ ے روایت کی۔

بیہقی ابو عبیدہ اور طبرانی ابو ہریرہ رضی اللہ تعالیٰ عنہ سے راوی کہ حضور صلی اللہ تعالیٰ علیہ وسلم نے فرمایا روزہ سپر ہے جب تک اسے پھاڑا نہ ہو۔ عرض کی گئی کس چیز سے پھاڑے گا۔ ارشاد فرمایا جھوٹ یا غیبت سے۔

ابن خزیمہ و ابن حبان و حاکم ابو ہریرہ سے راوی کہ حضور صلی اللہ تعالیٰ علیہ وسلم نے فرمیا روزہ اس کا نام نہیں کہ کھانے اور پینے سے باز رہنا ہو۔ روزہ تو یہ ہے کہ لغو و بیہودہ باتوں سے بچا جائے ۔

ابو داؤد و ترمذی عامر بن ربیعہ سے راوی کہتے ہیں میں نے بے شمار بار نبی صلی اللہ تعالیٰ علیہ وسلم کو روز میں مسواک کرتے دیکھا۔

فقہی مسائل

روزے میں جھوٹ، غیبت، چغلی، گالی دینا کیسا؟

مسئلہ: جھوٹ، چغلی، غیبت، گالی دینا، بیہودہ بات، کسی کو تکلیف دینا کہ یہ چیزیں ایسے بھی ناجائز و حرام ہیں روزہ میں اور زیادہ حرام اور ان کی وجہ سے روزہ میں کراہت آتی ہے ۔

روزہ میں بلا عذر کسی چیز کا چکھنا یا چبانا کیسا ہے؟

مسئلہ: روزہ دار کو بلا عذر کسی چیز کا چکھنا یا چبانا مکروہ ہے۔ چکھنے کے لئے عذر یہ ہے کہ مثلاً عورت کا شوہر یا باندی غلام کا آقا یا جیسے آج کل ملازم یا ملازمہ کا مالک بد مزاج ہے کہ نمک کم و بیش ہو گا تو اس کی ناراضی کا باعث ہو گا تو اس وجہ سے چکھنے میں حرج نہیں۔ چبانے کے لئے یہ عذر ہے کہ اتنا چھوٹا بچہ ہے کہ روٹی نہیں کھاسکتا اور کوئی نرم غذا نہیں کہ جو اسے کھلائیجائے نہ حیض و نفاس والی یا کوئی اور بے روزہ ہے جو اسے چبا کردے دے تو بچہ کے کھلانے کے لئے روٹی وغیرہ چبانا مکروہ نہیں۔ (در مختار وغیرہ) چکھنے کے وہ معنی نہیں جو آج کل عام محاورہ ہے یعنی کسی چیز کا مزہ دریافت کرنے کے لئے اس میں سے تھوڑا سا کھالینا کہ یوں ہو تو کراہت کیسی روزہ ہی جاتا رہے گا بلکہ کفارہ کے شرائط پائے جائیں تو کفارہ بھی لازم ہو گا بلکہ چکھنے سے مراد یہ ہے کہ زبان پر رکھ کر مزہ دریافت کرلیں اور اسے تھوک دیں تو اس میں سے حلق میں کچھ نہ جانے پائے۔

مسئلہ: کوئی چیز خریدی اور اس کا چکھنا ضرور ہے کہ نہ چکھے گا تو نقصان ہو گا تو چکھنے میں حرج نہیں ورنہ مکروہ ہے ۔یہاں بھی چکھنے سے مراد یہ ہے کہ حلق میں کچھ نہ جانے پائے۔( در مختار)

روزہ میں خوشبو سونگھنا، داڑھی یا مونچھ میں تیل ڈالنا کیسا ہے؟

مسئلہ: گلاب یا مشک وغیرہ سونگھنا، داڑھی مونچھ میں تیل لگانا اور سرمہ لگانا مکروہ نہیں۔ زینت کے لئے سرمہ لگایا یا اس لئے تیل لگایا کہ داڑھی بڑھ جائے حالانکہ ایک مشت داڑھی ہے تو یہ دونوں باتیں بغیر روزہ کے بھی مکروہ ہے اور روزہ میں بدرجہ اولیٰ۔ (در مختار)

روزہ دار کا کلی کرنے اور ناک میں پانی چڑھانے میں مبالغہ کرنا کیسا ہے؟

مسئلہ: روزہ دار کے لئے کلی کرنے اور ناک میں پانی چڑھانے میں مبالغہ کرنا مکروہ ہے۔ کلی میں مبالغہ کرنے کے یہ معنی ہیں کہ بھر منہ پانی لے اور وضو و غسل کے علاوہ ٹھنڈ پہنچانے کی غرض سے کلی کرنا یا ناک میں پانی چڑھانا یا ٹھنڈ کے لئے نہانا بلکہ بدن پر بھیگا کپڑا لپیٹنا مکروہ نہیں۔ ہاں اگر پریشانی ظاہر کرنے کے لئے بھیگا کپڑا لپیٹا تو مکروہ ہے کہ عبادت میں دل تنگ ہونا اچھی بات نہیں۔ (عالمگیری، رد المحتار، وغیرہ ہما)

روزہ دار کا منہ میں تھوک اکھٹا کرکے نگل جانا کیسا؟

مسئلہ: منہ میں تھوک اکھٹا کرکے نگل جانا بغیرروزہ کے بھی ناپسند ہے اور روزہ میں مکروہ۔ (عالمگیری)

روزہ دار کا ایسا کام کرنا جس سے کمزوری حد درجہ بڑھ جائے کیسا ہے؟

مسئلہ: رمضان کے دنوں میں ایسا کام کرنا جائز نہیں جس سے ایسی کمزوری آجائے کہ روزہ توڑنے کا گمان غالب ہو۔

سحری میں کتنی تاخیر کرنا مکروہ ہے؟

مسئلہ: سحری کھانا اور اس میں تاخیر کرنا مستحب ہے مگر اتنی تاخیر مکروہ ہے کہ صبح ہونے کا شک ہوجائے (عالمگیری)

مسئلہ: افطار میں جلدی کرنا مستحب ہے مگر افطار اس وقت کرے کہ غروب کا غالب گمان ہو جب تک گمان غالب نہ ہو افطار نہ کرے اگرچہ موذن نے اذان کہہ دی ہے اور ابر کے دنوں میں افطار میں جلدی نہ کرنی چاہیے (رد المحتار)

سحری و افطاری کا بیان

---

بخاری و مسلم و ترمذی و نسائی و ابن ماجہ حضرت انس سے راوی رسول اللہ صلی اللہ تعالیٰ علیہ وسلم نے فرمایا سحری کھائو کہ سحری کھانے میں برکت ہے۔

مسلم و ابو دائود و ترمذی و نسائی و ابن خزیمہ عمرو بن العاص سے راوی رسول اللہ صلی اللہ تعالیٰ علیہ وسلم نے فرمایا ہمارے اور اہل کتاب کے روزوں میں فرق سحری کا لقمہ ہے۔

طبرانی اوسط میں اور ابن حبان صحیح میں ابن عمر رضی اللہ تعالیٰ عنہما سے راوی کہ رسول اللہ صلی اللہ تعالیٰ علیہ وسلم نے فرمایا کہ اللہ تعالیٰ اور اس کے فرشتے سحری کھانے والوں پر درود بھیجتے ہیں۔

ابن ماجہ و ابن خزیمہ و بیہقی ابن عباس رضی اللہ تعالیٰ عنہما سے روایت کرتے ہیں کہ رسول اللہ صلی اللہ تعالیٰ علیہ وسلم نے فرمایا سحری کھانے سے دن کے روزہ پر استعانت کرو اور قیلولہ سے رات کے قیام پر۔

نسائی با سناد حسن ایک صحابی سے راوی کہتے ہیں حضور صلی اللہ تعالیٰ علیہ وسلم کی خدمت میں حاضر ہوا ، اور حضور صلی اللہ تعالیٰ علیہ وسلم سحری تناول فرمارہے تھے ارشاد فرمایا یہ برکت ہے کہ اللہ تعالیٰ نے تمہیں دی تو اسے نہ چھوڑنا۔

طبرانی کبیر میں عبداللہ بن عباس سے روایت کرتے ہیں کہ نبی صلی اللہ تعالیٰ علیہ وسلم نے فرمایا، تین شخصوں پر کھانے میں انشاء اللہ تعالیٰ حساب نہیں جبکہ حلال کھایا روزہ دار اور سحری کھانے والا اور سحری کھانے والا اور سرحد پر گھوڑا باندھنے والا۔

امام احمد ابو سعید خدری رضی اللہ تعالیٰ عنہ سے راوی کہ رسول اللہ صلی اللہ تعالیٰ علیہ وسلم نے فرمایا سحری کل کی کل برکت ہے اسے نہ چھوڑنا اگرچہ ایک گھونٹ پانی ہی پی لے کیونکہ سحری کھانے والوں پر اللہ اور اس کے فرشتے درود بھیجتے ہیں۔ نیز عبداللہ بن عمرو سائب بن یزید و ابو ہریرہ رضی اللہ تعالیٰ عنہما سے بھی اس قسم کی روایتیں آئیں۔

بخاری و مسلم و ترمذی سہل بن سعد رضی اللہ تعالیٰ عنہ سے راوی رسول اللہ صلی اللہ تعالیٰ علیہ وسلم فرماتے ہیں ہمیشہ لوگ خیر کے ساتھ رہیں گے جب تک افطار میں جلدی کریں گے ۔

ابن حبان صحیح میں انہیں سے راوی کہ فرمایا میری امت میری سنت پر رہے گی جب تک افطار میں ستاروں کا انتظار نہ کرے۔

احمد و ترمذی و ابن خزیمہ و ابن حبان ابو ہریرہ سے راوی کہ رسول اللہ صلی اللہ تعالیٰ علیہ وسلم فرماتے ہیں کہ اللہ عزو جل نے فرمایا میرے بندوں میں مجھے زیادہ پیارا وہ ہے جو افطار میں جلدی کرتا ہے۔

طبرانی اوسط میں یعلی بن مرہ سے مروی کہ فرمایا تین چیزوں کو اللہ محبوب رکھتا ہے افطار میں جلدی کرنا اور سحری میں تاخیر اور نماز میں ہاتھ پر ہاتھ رکھنا۔

کیا سحری کا وقت اذانِ فجر تک ہوتا ہے؟

مسئلہ: بسا اوقات معلومات نہ ہونے کے باعث ہماری عبادتیں ضائع ہوجاتی ہیں۔ انہی میں سے روزہ کا ضائع ہوجانا بھی شامل ہے۔ وہ اس طرح کہ اکثر لوگ فجر کی اذان کو سحری کا حتمی آخری وقت سمجھتے ہیں، حالانکہ یہ درست نہیں۔ کیونکہ اذان نماز کے لئے اعلان ہے نہ کہ سحری کے اختتام کا اعلان۔ لہٰذا ہمیں چاہیے کہ سحری کے ختم ہونے کا وقت نقشہ دائمی اوقات الصلوٰۃمیں دیکھ لیں اور سحری کا وقت ختم ہونے سے پہلے کھانا پیند بند کردیں۔

مسائل تراویح

---

تراویح و بیس رکعتیں سنت موکدہ نماز ہے جو رمضان المبارک کی ہر رات میں عشاء کی فرض اور سنتون کے بعد پڑھی جاتی ہے ۔ اس نما زکا طریقہ یہ ہے کہ بیس رکعتیں دو دو کرکے دس سلام سے پڑھئے ۔ اور ہر چار رکعت پڑھ لینے کے بعد اتنی دیر آرام لینے کے لے بیٹھے ۔ جتنی دیر میں چار رکعتیں پڑھی جاسکتی ہیں۔ اس آرام کرنے کے لئے بیٹھنے کو ترویجہ کہتے ہیں۔ ترویحہ میں تسبیح تراویح پڑھنا افضل ہے۔

تسبیح تراویح

سُبْحَانَ ذِی الْمُلْکِ وَالْمَلَکُوْتَ سُبْحَانَ ذِی الْعِزَّۃِ وَالْعَظَمَۃِ وَالْھَیْبَۃِ وَالْقُدْرَۃِ وَالْکِبْرِیَائِ وَالْجَبَرُوْتِ سُبْحَانَ الْمَلِکِ الْحَیِّ الَّذِیْ لَایَنَامُ وَلَا یَمُوْتُ سُبُّوْحُ قُدُّْسُ رَبُّنَا وَرَبُّ الْمَلَائِکَۃِ وَالرُّوْح اَللّٰھُمَّ اَجِرْنا مِنَ النَّارِیَا مُجِیْرُ یَا مُجِیْرُ یَا مُجِیْرُ

نمازِ تراویح کے بعد وتر اور نفل پڑھ کر نماز ختم کریں۔ نمازِ تراویح کا بے انتہا ثواب ہے۔

احادیث مبارکہ کی روشنی میں تراویح کی اہمیت

حضرت ابن عباس رضی اللہ عنہ فرماتے ہیں کہ رسول اللہ صلی اللہ تعالیٰ علیہ وسلم رمضان شریف میںبیس رکعت تراویح اور وتر پڑھا کرتے تھے۔

حضرت سائب بن یزید صحابی رضی اللہ عنہ فرماتے ہیں کہ ہم حضرت عمر رضی اللہ عنہ کے زمانہ میں بیس رکعت تراویح اور وتر پڑھتے تھے۔

ابن ابی شیبیہ اپنے مصنف میں عبدالعزیز بن رفیع سے روایت کرتے ہیں۔ انہوں نے فرمایا کہ ابی بن کعب رضی اللہ عنہ رمضان شریف میں لوگوں کو بیس رکعت مدینہ شریف میں پڑھاتے تھے اور تین رکعت وتر۔ (آثار السنن: صفحہ۵۵)

ابن تیمیہ منہاج السنۃ جلد ۴ صفحہ ۲۲۴ میں لکھتا ہے کہ حضرت علی رضی اللہ عنہ نے رمضان شریف میں قاریوں کو بلایا اور ان میں سے ایک کو حکم دیا کہ لوگوں کو بیس رکعت پڑھائے اور خود حضرت علی رضی اللہ عنہ ان کو وتر پڑھاتے تھے۔ اس کو بیہقی نے روایت کیا ہے۔

اس حدیث سے معلوم ہوا کہ حضرت علی رضی اللہ عنہ کے زمانہ میں بھی لوگ بیس رکعت پڑھتے تھے۔

سعید بن عبید لکھتے ہیں کہ علی بن ربیعہ تابعی رمضان شریف میں ہمیں پانچ تراویح (بیس رکعت) اور وتر پڑھاتے تھے۔ اس کو ابن ابی شیبہ نے فضل بن وکین سے اس نے سعید بن عبید سے روایت کیا۔ اس کی سند صحیح ہے۔

تراویح کے مسائل و احکام

مسئلہ: تراویح جس طرح مردوں کے لئے سنت موکدہ ہے اسی طرح عورتوں کے لئے سنت موکدہ ہے ، اس کا چھوڑنا جائز نہیں۔

مسئلہ: مہینہ بھر کی کل تراویح میں ایک بار قرآن مجید کا ختم کرنا سنت موکدہ ہے اور دو مرتبہ فضیلت اور تین مرتبہ افضل ہے۔

جو حضرات تین روزہ، چھ روزہ ، وغیرہ نمازِ تراویح پڑھ لیں، کیا انہیں بقیہ رمضان میں تراویح پڑھنے کی ضرورت نہیں؟

مسئلہ: تین روزہ، چھ روزہ وغیرہ تراویح پڑھنے سے پورے رمضان کی تراویح کی نماز ادا نہیں ہوجاتی لہٰذا بیس رکعت تراویح ہر رمضان کی رات کو پڑھنا سنت وموکدہ و ضروری ہے۔

کیا جماعت سے پڑھنا ضروری ہے؟

مسئلہ: تراویح میں جماعت سنت کفایہ ہے۔ کہ اگر محلہ کے سب لوگ چھوڑ دیںگے تو سب گناہ گار ہوں گے اور اگر کسی ایک نے گھر میں تنہا پڑھ لی تو گناہ گار نہیں۔ مگر جو شخص مقتدا ہو کہ اس کے ہونے سے جماعت بڑی ہوتی ہے اور چھوڑدے گا تو لوگ کم ہوجائیں گے، اسے بلا عذر چھوڑنے کی اجازت نہیں۔ (عالمگیری)

مسئلہ: تراویح مسجد میں با جماعت پڑھنا افضل ہے اگر گھر میں جماعت سے پڑھی تو جماعت کے ترک کا گناہ نہ ہوا مگر وہ ثواب نہ ملے گا جیسے مسجد میں پڑھنے کا تھا۔ (عالمگیری)

کیا تراویح کیلئے خوش خواں قاری کو امام ہونا چاہیے ؟

مسئلہ: خوش خواں کو امام نہ بنانا چاہیے بلکہ درست خواں قاری کو امام بنانا چاہیے۔ افسوس صد افسوس کہ اس زمانے میں حفاظ کی حالت نہایت نا گفتہ بہ ہے۔ اکثر تو ایسا پڑھتے ہیں کہ یعلمون، تعلمون کے سوا کچھ پتہ نہیں چلتا۔ الفاظ و حروف کھا جایا کرتے ہیں۔

کیا نابالغ امام کے پیچھے بالغین کی تراویح ہوسکتی ہے؟

مسئلہ: نا بالغ امام کے پیچھے بالغین کی تراویح نہیں ہوگی۔ یہی صحیح ہے ۔ (عالمگیری)

اگر عشاء جماعت سے نہیں پڑھی تو کیا وتر جماعت سے پڑھ سکتے ہیں؟

مسئلہ: اگر عشاء جماعت سے پڑھے اور تراویح تنہا تو وتر کی جماعت میں شریک ہو سکتا ہے ۔ اگر عشاء تنہا پڑھ لی اگرچہ تراویح با جماعت پڑھی تو وتر تنہا پڑھے۔

تراویح کی کتنی رکعتیں پڑھنا سنت ہے؟

مسئلہ: بیس (۲۰) رکعت تراویح سنت ہے۔

برصغیر پاک و ہند میں انگریزوں کے آنے سے پہلے دنیا میں کہیں بھی آٹھ (۸) رکعت تراویح نہیں پڑھی جاتی تھی۔ بلکہ بیس (۲۰) تراویح ہی پڑھی جاتی تھی، لیکن انگریزوں کا غلام اور ایجنٹ فرقہ نام نہاد اہلحدیث کا بانی غیر مقلد مولوی اسماعیل قتیل وہابی نے لوگوں کو نماز سے دور کرنے کے لئے اس فتنہ کی بنیاد رکھی۔

تراویح کی فضیلت

سرکارِ دو عالم صلی اللہ تعالیٰ علیہ وسلم ارشاد فرماتے ہیںکہ جو شخص صدق دل اور اعتقاد صحیح کے ساتھ ماہِ رمضان میں قیام کرے یعنی تراویح پڑھے تو اس کے اگلے گناہ بخش دئیے جاتے ہیں۔ حضور اللہ تعالیٰ علیہ وسلم نے اپنے فرمان میں اس بات کی قید فرمائی ہے کہ تراویح پڑھنا عقائد کی درستگی کے ساتھ ہو تب ہی مغفرت کا مستحق ہوگا۔ آج لوگ آٹھ (۸) رکعت تراویح کی رٹ لگائے ہوئے ہیں۔ ان آٹھ رکعت تراویح کی رٹ لگانے والوں کو چاہیے کہ پہلے اپنے عقائد اور ایمان کو درست کرنے کی فکر کریں ، پھر تراویح پر بحث کریں۔

بیس رکعت تراویح

محدث ابن جوزی (جن کو غیر مقلد اہلحدیث حضرات کے مقتدر عالم مولوی وحید الزمان نے اپنی کتاب ’’ہدایۃ المہدی‘‘ کے صفحہ نمبر ۷ پر اپنا امام اور رہنما تسلیم کیا ہے ) اپنی کتاب الوفا میں صفحہ نمبر 805 جلد ۲ مطبوعہ مصر میں صلوٰۃ التروایح کا باب باندھ کر صرف ایک حدیث شریف نقل فرمائی ہے اور یہی حدیث پاک محدث بیہقی علیہ الرحمہ نے سنن کبریٰ صفحہ 496 جلد 2 شیخ محقق شاہ عبدالحق محدث دہلوی علیہ الرحمۃ نے ماثبت بالسنۃ اور شاہ عبدالعزیز محدث دہلوی نے فتاویٰ عزیزی صفحہ 119 جلد 1 میں بیان فرمائی ہے ۔ سید المفسرین حضرت عبداللہ بن عباس رضی اللہ عنہ فرماتے ہیں کہ:

’’رسول اللہ صلی اللہ تعالیٰ علیہ وسلم رمضان شریف میں بیس رکعت تراویح اور وتر پڑھا کرتے تھے‘‘۔

سیدنا عمر فاروق رضی اللہ تعالیٰ عنہ کا بیس رکعت تراویح پڑھنا

محدث بیہقی نے سنن کبریٰ کے صفحہ 496 جلد 2 اور امام جلال الدین سیوطی مصابیح میں اور شاہ عبدالعزیز محدث دہلوی نے فتاویٰ عزیزی صفحہ 120 جلد 1 میں روایت درج فرمائی ۔ سائب بن یزید رضی اللہ عنہ صحابی رسول صلی اللہ تعالیٰ علیہ وسلم نے فرمایا کہ سیدنا عمر بن الخطاب رضی اللہ تعالیٰ عنہ کے عہد مبارک میں ماہِ رمضان میں لوگ بیس رکعت تراویح پڑھتے تھے۔

وہابیوں کے مجدد اور شیخ الا سلام ابن تیمیہ کا بیان

غیر مقلدین اہلحدیث حضرات کے دوسرے مجدد اور شیخ الا سلام ابن تیمیہ اپنی کتاب منہاج السنۃ صفحہ 220 ، جلد 4میں بھی درج کیا ہے کہ ’’بیہقی نے صحیح اسناد کے ساتھ روایت کیا ہے کہ صحابہ کرام رضی اللہ عنہم حضرت عمر فاروق رضی اللہ عنہ کے دورِ خلافت میں بیس رکعات تراویح پڑھا کرتے تھے اسیطرح حضرت عثمان غنی رضی اللہ عنہ اور حضرت علی رضی اللہ عنہ کے عہد میں پڑھا کرتے تھے۔

سردار نا م نہاد اہلحدیث مولوی ثناء اللہ امرتسری کا بیان

دنیا ئے غیر مقلدین کی مشہور شخصیت مولوی ثناء اللہ امرتسری جن کو وہابی سردار اہلحدیث کے معزز لقب سے یاد کرتے ہیں۔ انہوں نے بھی اپنے اہلحدیث امرتسر کے صفحہ 13 پر 25 دسمبر 1936 کو فتویٰ درج کرتے ہوئے تحریر کیا ’’ بیس رکعت تراویح پڑھنے والوں کو خلافِ سنت کہنا اچھا نہیں، ایسے امور میں اختلاف خواص ہے ‘‘۔

سیدنا غوث اعظم رضی اللہ عنہ کا فرمان

حضور غوث اعظم رضی اللہ عنہ فرماتے ہیں کہ :

’’نماز تراویح نبی کریم صلی اللہ تعالیٰ علیہ وسلم کی سنت ہے ‘‘۔

ھی عشرون رکعۃ (وہ بیس رکعت ہیں ) (غنیۃ الطالبین: صفحہ 489)

شیخ محقق شاہ عبدالحق محدث دہلوی رحمتہ اللہ علیہ کا فرمان

پاک و ہند میں سب سے پہلے علم حدیث کی اشاعت اور تشہیر کرنے والی شخصیت شیخ محقق شاہ عبدالحق محدث دہلوی رحمتہ اللہ علیہ کا ارشاد پیش کیا جاتا ہے۔ سنئے اور اپنے مسلک کی حقانیت کا یقین رکھیں۔ فرماتے ہیں کہ:’’وہ حکم جس پر اجماع ہوا ہے اور صحابہ کرام اور تابعین حضرات اور علمائے کرام ما بعد میں مشہور چلا آرہا ہے، وہ بیس رکعات تراویح ہے‘‘۔ (ماثبت بالسنۃ: صفحہ 159)

زکوٰۃ ۔۔۔احکام و مسائل

---

قرآن کریم کی روشنی میں زکوۃ کی اہمیت

قرآن میں ارشادِ باری تعالیٰ ہے :

مَثَلُ الَّذِیۡنَ یُنۡفِقُوۡنَ اَمۡوَالَہُمۡ فِیۡ سَبِیۡلِ اللّٰہِ کَمَثَلِ حَبَّۃٍ اَنۡۢبَتَتۡ سَبۡعَ سَنَابِلَ فِیۡ کُلِّ سُنۡۢبُلَۃٍ مِّائَۃُ حَبَّۃٍ ؕ وَ اللّٰہُ یُضٰعِفُ لِمَنۡ یَّشَآءُ ؕ وَ اللّٰہُ وَاسِعٌ عَلِیۡمٌ ﴿۲۶۱﴾ اَلَّذِیۡنَ یُنۡفِقُوۡنَ اَمۡوَالَہُمۡ فِیۡ سَبِیۡلِ اللّٰہِ ثُمَّ لَا یُتۡبِعُوۡنَ مَاۤ اَنۡفَقُوۡا مَنًّا وَّ لَاۤ اَذًی ۙ لَّہُمۡ اَجۡرُہُمۡ عِنۡدَ رَبِّہِمۡ ۚ وَ لَا خَوۡفٌ عَلَیۡہِمۡ وَ لَا ہُمۡ یَحۡزَنُوۡنَ ﴿۲۶۲﴾ قَوۡلٌ مَّعۡرُوۡفٌ وَّ مَغۡفِرَۃٌ خَیۡرٌ مِّنۡ صَدَقَۃٍ یَّتۡبَعُہَاۤ اَذًی ؕ وَ اللّٰہُ غَنِیٌّ حَلِیۡمٌ ﴿۲۶۳﴾

(البقرۃ:۲۶۱-۲۶۳)

ترجمہ:جو لوگ اللہ کی راہ میں خرچ کرتے ہیں ان کی کہاوت اس دانہ کی ہے جس سے سات بالیں نکلیں۔ ہر بال میں سو دانے اور اللہ جسے چاہتا ہے زیادہ دیتا ہے اور اللہ وسعت والا بڑا علم والا ہے ۔ جو لوگ اللہ کی راہ میں اپنے مال خرچ کرتے ہیں پھر خرچ کرنے کے بعد نہ احسان جتاتے نہ اذیت دیتے ہیں ان کے لئے ان کا ثواب ان کے رب کے حضور ہے اور نہ ان پر کچھ خوف ہے اورنہ وہ غمگین ہوں گے ۔ اچھی بات اور مغفرت اس صدقہ سے بہتر ہے جس کے بعد اذیت ہو اور اللہ بے پرواہ حلم والا ہے ۔ 

ایک اور جگہ ارشادِ باری تعالیٰ ہے :

لَنۡ تَنَالُوا الۡبِرَّ حَتّٰی تُنۡفِقُوۡا مِمَّا تُحِبُّوۡنَ ۬ؕ وَ مَا تُنۡفِقُوۡا مِنۡ شَیۡءٍ فَاِنَّ اللّٰہَ بِہٖ عَلِیۡمٌ ﴿۹۲﴾

(آل عمران: ۹۲)

ہرگز نیکی حاصل نہ کرو گے جب تک اس میں سے نہ خرچ کرو جسے محبوب رکھتے ہو اور جو کچھ خرچ کرو گے اللہ اسے جانتا ہے ۔ 

احادیث مبارکہ کی روشنی میں زکوۃ کی اہمیت

حضرت جابر رضی اللہ عنہ سے مروی ہے کہ حضور اکرم صلی اللہ تعالیٰ علیہ وسلم نے فرمایا جس نے اپنے مال کی زکوٰۃ ادا کردی۔ بیشک اللہ تعالیٰ نے اس سے شر دور فرما دیا۔

بزار میں علقمہ سے روایت ہے کہ حضور صلی اللہ تعالیٰ علیہ وسلم نے فرمایا کہ تمہارا اسلام میں پورا ہونا یہ ہے کہ اپنے اموال کی زکوٰۃ ادا کرو۔

ابو داؤد میں حسن بصری سے مرسلاً اور طبرانی و بیہقی نے ایک جماعت صحابہ کرام رضی اللہ تعالیٰ عنہم سے روایت کی ہے کہ حضور صلی اللہ تعالیٰ علیہ وسلم فرماتے ہیں کہ زکوٰۃ دے کر اپنے مالوں کو مضبوط قلعوں میں کرلو اور اپنے بیماروں کا علاج صدقہ سے کرو اور بلا نازل ہونے پر دعا و تضرع سے استعانت کرو۔

احادیث کی روشنی میںزکوۃ ادا نہ کرنے والوں کے لئے سخت وعید

حضور پر نور صلی اللہ تعالیٰ علیہ وسلم فرماتے ہیں کہ جس کے پاس سونا چاندی ہو اور اس کی زکوٰۃ نہ دے، قیامت کے دن اس زرو سیم کی تختیاں بنا کر جہنم کی آگ میں تپائیں گے۔ پھر ان سے اس شخص کی پیشانی اور کروٹ اور پیٹھ پر داغ دیں گے ۔ جب وہ تختیاں ٹھنڈی ہوجائیں گی، پھر انہیں تپائیں گے کہ قیامت کا دن پچاس ہزار برس کا ہے یونہی کرتے رہیں گے کہ تمام مخلوق کا حساب ہوجائے گا۔

مصطفی صلی اللہ تعالیٰ علیہ وسلم فرماتے ہیں کہ جو شخص اپنے مال کی زکوٰۃ نہ دے گا، وہ مال روز قیامت گنجے اژدھے کی شکل بنے گا اور اس کے گلے میں طوق ہو کر پڑے گا۔ پھر سید عالم صلی اللہ تعالیٰ علیہ وسلم نے کتاب اللہ سے اس کی تصدیق کی تھی کہ رب عزوجل فرماتا ہے:ترجمہ: ’’جس چیز میں بخل کررہے ہیں ، قریب ہے کہ طوق بنا کر ان کے گلے میں ڈالی جائے قیامت کے دن‘‘۔

حضور صلی اللہ تعالیٰ علیہ وسلم نے فرمایا کہ وہ اژدھا منہ کھول کر اس کے پیچھے دوڑے گا ، یہ بھاگے گا اس سے فرمایا جائے گا ، لے اپنا خزانہ کہ چھپا کر رکھا تھا کہ میں اس سے غنی ہوں جب دیکھے گا کہ اس اژدھے سے کہیں بچائو نہیں ، ناچار اپنا ہاتھ اس کے منہ میں دے دے گا۔ وہ ایسا چبائے گا جیسے نر اونٹ چباتا ہے۔ (رواہ مسلم عن جابر)

رسول اللہ صلی اللہ تعالیٰ علیہ وسلم فرماتے ہیں کہ قیامت کے دن تونگروں کے لئے محتاجوں کے ہاتھ سے خرابی ہے۔ محتاج عرض کریں گے اے رب ! انہوں نے ہمارے وہ حقو ق جو تو نے ہمارے لئے ان پر فرض کئے تھے ظلماً نہ دئیے، اللہ عزوجل فرمائے گا کہ مجھے قسم ہے اپنی عزت و جلال کی ! کہ تمہیں اپنا قرب عطا کروں گا اور انہیں دور رکھوں گا۔ (رواہ الطبرانی و ابوشیخ عن انس رضی اللہ تعالیٰ عنہ)

دو عورتیں خدمت والا سونے کے کنگن پہنے حاضر ہوئیں۔ حضور اقدس صلی اللہ تعالیٰ علیہ وسلم نے فرمایا ان کی زکوٰۃ دیتی ہو۔ عرض کی نہیں حضور اکرم صلی اللہ تعالیٰ علیہ وسلم نے فرمایا کیا چاہتی ہو کہ اللہ تعالیٰ تمہیں آگ کے کنگن پہنائے ۔ عرض کی: نہیں ۔ فرمایا تو زکوٰۃ دو۔

زکوٰۃ کے لغوی معنی:

زکوٰۃ اسلام کا ایک انتہائی اہم رکن ہے۔ زکوٰۃ کے لغوی معنی پاکیزگی کے ہیں، کیونکہ زکوٰۃ ادا کرنے سے مال پاک ہوجاتا ہے۔ زکوٰۃ ادا کرنے سے مال میں برکت ہوتی ہے، اور ہر قسم کے نقصان سے محفوظ رہتا ہے زکوٰۃ ہمیشہ صحیح مصرف میں خرچ کرنا چاہیے ، ورنہ دینا نہ دینا برابر ہوجاتا ہے۔

زکوٰۃ کے شرعی معنی:

زکوٰۃ شریعت میں اللہ تعالیٰ کے لئے مال کے ایک حصہ کا جو شرع نے مقرر کیا ہے۔ مسلمان فقیر کو مالک قرار دینا ہے اور وہ فقیر نہ ہاشمی ہو نہ ہاشمی کا آزاد کردہ غلام۔

زکوۃ کے احکام و مسائل

زکوٰۃ فرض ہے:

زکوٰۃ فرض ہے اس کا منکر کافر اور نہ دینے والا فاسق اور قتل کا مستحق اور ادا میں تاخیر کرنے والا گناہگار اور مردود الشہادۃ ہے۔

زکوٰۃ واجب ہونے کے لئے کیا شرائط ہیں؟

زکوٰۃ واجب ہونے کے لئے چند شرطیں یہ ہیں:(۱) مسلمان ہونا (۲) بالغ ہونا (۳) عاقل ہونا (۴) آزاد ہونا (۵) مالک نصاب ہونا (۶) پورے طور پر مالک ہونا (۷) نصاف قرض سے فارغ ہونا (۸) نصاب کا حاجت اصلیہ سے فارغ ہونا (۹) مال کا نامی ہونا (۱۰) سال گذرنا

۱… مسلمان ہونا: کافر پر زکوٰۃ واجب نہیں، اگر کوئی کافر مسلمان ہوا تو اسے یہ حکم نہ دیا جائے گا کہ کفر کے زمانے کی زکوٰۃ اداکرے۔

۲… بالغ ہونا: نابالغ پر زکوٰۃ واجب نہیں۔

۳…عاقل ہونا : مجنون پر زکوۃ واجب نہیں، جب کہ جنون پورے سال کو گھیر لے اور اگر سال کے اول و آخر میں اچھا ہوجاتا ہے چاہے بیچ سال میں اچھا نہ ہو تو زکوٰۃ واجب ہے۔ اور جنون اگر اصلی ہو یعنی جنون ہی کی حالت میں بلوغ ہوا تو اس کا سال ہوش آنے سے شروع ہو گا یونہی اگر جنون عارضی ہے مگر پورے سال کو گھیر لیا تو جب افاقہ ہوگا، اس وقت سے سال کی ابتداء ہوگی۔

۴…آزاد ہونا:غلام پر زکوٰۃ واجب نہیں۔

۵…مالک نصاب ہونا: نصاب سے کم میں زکوٰۃ واجب نہیں، یعنی جتنے مال پر شریعت نے زکوٰۃ مقرر کی ہے اس سے کم مال کا مالک ہے تو زکوٰۃ واجب نہیں۔

۶… پورے طور پر مالک ہونا:

پورے طور پر مال کا مالک ہویعنی اس پر قبضہ بھی ہو تب زکوٰۃ واجب ہے، ورنہ نہیں۔

مسئلہ: جو مال گم ہو گیا یا دریا میں گر گیا یا کسی نے غصب کرلیا اور اس کے پاس غصب کے گواہ نہیں یا جنگل میں دفن کردیا تھا اور یہ یاد نہیں رہا کہ کہاں دفن کیا تھا یا انجان کے پاس امانت رکھی تھی اور یہ یاد نہیں رہا کہ وہ کون ہے یا مدیون نے دین سے انکارکردیا اور اس کے پاس گواہ ہیں پھر یہ مال مل گیا تو جب تک نہ ملا تھا اس زمانہ کی زکوٰۃ واجب نہیں۔ اگر ایسے پردین ہے جو دین کا اقرار کرتا ہے مگر ادائیگی میں دیر کرتا ہے یا نادار ہے یا قاضی کے پاس اس کے مفلس ہونے کا حکم ہوچکا ہے یا وہ منکر ہے مگر اس کے پاس گواہ موجود ہیں تو جب مال ملے گا گذرے ہوئے سالوں کی بھی زکوٰۃ واجب ہے۔

۷… نصاب کا دین سے فارغ ہونا:

مسئلہ: نصاب کا مالک تو ہے مگر اس پر اتنا دین ہے کہ دین ادا کرنے کے بعد نصاب نہیں رہتا تو زکوٰۃ واجب نہیں چاہے دین بندہ کا ہو (جیسے قرض، زرثمن، کسی چیز کا تاوان) چاہے خدا کا ہو (جیسے زکوٰۃ و خراج) مثلاً کوئی شخص صرف ایک نصاب کا مالک ہے اور دو سال گزر گئے کہ زکوٰۃ نہیں دی تو صرف پہلے سال کی زکوٰۃ تو اس پر دین ہے۔ اس کے نکالنے کے بعد نصاب باقی نہیں رہتا۔ لہٰذا دوسرے سال کی زکوٰۃ واجب نہیں ہوئی۔

مسئلہ: جو دین میعادی ہو وہ زکوٰۃ سے نہیں روکتا ۔ چونکہ عادتاً دین مہر کا مطالبہ ہوتا، لہٰذا اگرچہ شوہر کے ذمہ کتنا ہی دین مہر ہو جب وہ مالک نصاب ہے تو زکوٰۃ واجب ہے۔

مسئلہ: دین اس وقت زکوٰۃ سے روکتا ہے، جب زکوٰۃ واجب ہونے سے پہلے کا ہو اور اگر نصاب پر سال گزرنے کے بعد دین ہوا تو زکوٰۃ پر کوئی اثر نہیں، زکوٰۃ دینی ہوگی۔

۸…نصاب کا حاجت اصلیہ سے فارغ ہونا: جو مال حاجت اصلیہ کے علاوہ ہو اس میں زکوٰۃ واجب ہے جب کہ وہ نصاب کے برابر ہو۔

حاجت اصلیہ سے کیا مراد ہے؟

مسئلہ: یعنی زندگی بسر کرنے میں جس چیز کی ضرورت ہو، اس میں زکوٰۃ واجب نہیں، جیسے رہنے کا مکان، جاڑے گرمیوں میں پہننے کے کپڑے، خانہ داری کے سامان، سواری کے جانور، آلات ۔ پیشہ وروں کے اوزار، اہل علم کے لئے حاجت کی کتابیں، کھانے کے لئے غلہ۔

۹…مال کا نامی ہونا:

مسئلہ: مال کا نامی ہونا یعنی بڑھنے والا خواہ حقیقتاً بڑھے یا حکماً یعنی اگر بڑھانا چاہے تو بڑھائے یعنی اس کے پاس یا اس کے نائب کے قبضے میں ہو۔ ہر ایک کی دو صورتیں ہیں۔ وہ اس لئے پیدا کیا گیا ہو، اسے خلقی کہتے ہیں۔ جیسے سونا چاندی کہ یہ اس لئے پیدا ہوئے ہیں کہ ان سے چیزیں خریدی جائیں یا اس لئے مخلوق تو نہیں مگر اس سے یہ بھی حاصل ہوتا ہے کہ اسے فعلی کہتے ہیں۔ سونے چاندی کے علاوہ سب چیزیں فعلی ہیں کہ تجارت سے سب میں نمو ہوگا۔

۱۰…سال گزرنا:

مسئلہ: سال سے مراد قمری سال ہے یعنی چاند کے مہینوں سے بارہ مہینے شروع سال اور آخر سال میں نصاب کام ہے ۔ مگر درمیان میں نصاب کی کمی ہوگئی تو یہ کمی کچھ اثر نہیں رکھتی یعنی زکوٰۃ واجب ہے۔

زکوٰۃ کتنے قسم کے مال پر فرض ہے؟

زکوٰۃ تین قسم کے مال پرہے ۔ (۱) ثمن یعنی سونا چاندی (۲) مالِ تجارت (۳) سائمہ یعنی چرائی پر چھوڑے جانور۔

مسئلہ: سونے چاندی میں مطلقاً زکوٰۃ واجب ہے۔ جب کہ بقدر نصاب ہوں اگرچہ دفن کرکے رکھے ہوں یا استعمال میں ہوں۔ تجارت کرے یا نہ کرے۔ اور ان کے علاوہ باقی چیزوں پر زکوٰۃ اس وقت واجب ہے کہ تجارت کی نیت ہو یا چرائی پر چھوڑے جانور۔

کیا موتی اور جوہرات پر بھی زکوٰۃ واجب ہے؟

مسئلہ: موتی اور جواہرات پر زکوٰۃ واجب نہیں اگرچہ ہزاروں کے ہوں ہاں اگر تجارت کی نیت سے لئے تو زکوٰۃ واجب ہوگی۔

صاحب نصاب کے کتنے مال پر زکوٰۃ واجب ہے؟

مسئلہ: جو شخص نصاب کا مالک ہے اگر درمیان سال میں کچھ اور مال بڑھا تو اس بڑھے ہوئے مال کا سال الگ نہیں بلکہ پہلے مال کا ختم سال اس کے لئے بھی ختم سال ہے، اگرچہ سال پورا ہونے سے ایک ہی منٹ پہلے حاصل ہوا ہو۔

کیا زکوٰہ دیتے وقت نیت کرنا ضروری ہے؟

مسئلہ: زکوٰۃ دیتے وقت یا زکوٰۃ کے لئے مال الگ کرتے وقت زکوٰۃ کی نیت کا ہونا ضروری ہے ۔ نیت کے یہ معنی ہیں کہ اگر پوچھا جائے تو بلا تامل بتاسکے کہ زکوٰۃ ہے۔

جوشخص سال بھرخیرات کرے اس کے بعد نیت کرے کہ جو کچھ دیا وہ زکوٰۃ ہے کیا اس سے زکوٰۃ ادا ہوگی؟

مسئلہ: سال بھر تک خیرات کرتا رہا، اس کے بعد نیت کی جو کچھ دیا ہے، وہ زکوٰۃ ہے۔ اس طرح زکوٰۃ ادا نہیں ہوئی۔

زکوٰۃ کا مال اگر فقیر لوٹ لیں تو کیا حکم ہے؟

مسئلہ: زکوٰۃ کا مال ہاتھ پر رکھا تھا کہ فقیروں نے لوٹ لیا تو زکوٰۃ ادا ہوگئی اور اگر ہاتھ سے گر گیا اور فقیروں نے اٹھا لیا مگر یہ اسے پہچانتا ہے اور راضی ہوگیا اور مال برباد نہ ہوا تو ادا ہوگئی۔

کیا زکوٰۃ کا مال مسجد اور مردہ کی تجہیز و تکفین میں لگا سکتے ہیں؟

مسئلہ: زکوٰۃ کا روپیہ مردہ کی تجہیز و تکفین (کفن دفن) یا مسجد کی تعمیر میں نہیں لگا سکتا کہ اس میں فقیر کو مالک کردینا نہیں پایا گیا اگر ان چیزوں میں خرچ کردینا چاہے تو اس کا طریقہ یہ ہے کہ فقیر کو مالک کردیں۔ یہ فقیر خرچ کرے، ثواب دونوں کو ہوگا۔

حدیث شریف میں آیا ہے کہ اگر سو ہاتھوں میں دقہ گزرا تو سب کو ویسا ہی ثواب ملے گا جیسا دینے والے کو اور اس کے اجر میں کچھ کمی نہ ہوگی۔

کیا زکوٰۃ دیتے وقت منہ سے زکوٰۃ کہہ کر دینا ضروری ہے؟

مسئلہ: زکوٰہ دینے میں اس کی ضرورت نہیں کہ فقیروں کو زکوٰۃ کہہ کر دے بلکہ صرف زکوٰۃ کی نیت کافی ہے۔ یہاں تک کہ اگر کوئی اور لفظ جیسے ہدیہ ، نذریا بچوں کے لئے مٹھائی کھانے کو تمہیں عید کرنے کو کہہ دیا اور خود نیت زکوٰۃ کی رکھی تو بھی ادا ہوجائے گی۔ بعض محتاج ضرورت مند زکوٰۃ کا روپیہ نہیں لیتے انہیں زکوٰۃ دینے میں زکوٰۃ کا لفظ نہ کہے۔

اگر کوئی شخص اپنی ملکیت سے زائد آئندہ ہونے والی آمدنی کی بھی زکوٰۃ ادا کردے تو اس کا کیا حکم ہے؟

مسئلہ: ایک لاکھ کا مالک ہے اور دو لاکھ کی زکوٰۃ دی اور نیت یہ ہے کہ سال تمام تک اگر ایک لاکھ اور ہوگئے تو یہ اس کی ہے۔ ورنہ آئندہ سال میں محسوب ہوگی تو یہ جائز ہے۔

اگر کسی شخص و شک ہو کہ زکوٰۃ ادا کی ہے یا نہیں تو کیا حکم ہے؟

مسئلہ: اگر شک ہے کہ زکوٰۃ دی یا نہیں تو اب دے۔

زکوٰۃ دینے کے لئے دکیل بنایا مگر وکیل نے زکوٰۃ دیتے وقت زکوٰۃ دینے کی نیت نہ کیا تو کیا زکوٰۃ اد اہوگئی؟

مسئلہ: زکوٰۃ دینے کے لئے وکیل بنایا اور وکیل کو بہ نیت زکوٰۃ مال دیا مگر وکیل نے فقیر کو دیتے وقت نیت نہیں کی، ادا ہوگئی۔ یونہی زکوٰۃ کا مال زمی کو دیا کہ وہ فقیر کو دے دے اور ذمی کو دیتے وقت نیت کرلی تھی تو یہ نیت کافی ہے۔

کیا وکیل مال زکوٰۃ اپنی اولاد یا بیوی کو دے سکتا ہے؟

مسئلہ: وکیل کو اختیار ہے کہ مال زکوٰۃ اپنے لڑکے یا بی بی کو دیدے جب کہ یہ فقیر ہوں اور لڑکا اگر نابالغ ہے تو اسے دینے کے لئے خود اس وکیل کا فقیر ہونا بھی ضروری ہے مگر اپنی بی بی یا اولاد کو اس وقت دے سکتا ہے جب موکل نے ان کے سوا کسی خاص شخص کو دینے کے لئے نہ کہہ دیا ہو ورنہ انہیں نہیں دے سکتا۔

کیا وکیل مال زکوٰۃ خود لے سکتا ہے؟

مسئلہ: وکیل کو یہ اختیار نہیں کہ خود لے لے ہاں اگر زکوٰۃ دینے والے نے یہ کہہ دیا ہو کہ جس جگہ چاہو صرف کرو تو لے سکتا ہے۔

کیا وکیل کسی دوسرے کو مالک کی اجازت کے بغیر وکیل بناسکتا ہے؟

مسئلہ: زکوٰۃ کے وکیل کو یہ اختیار نہیں کہ بغیر اجازت مالک دوسرے کو وکیل بنا دے۔

کیا مال مباح کرنے سے زکوٰۃ ادا ہوجاتی ہے؟

مسئلہ: مباح کردینے سے زکوٰۃ ادا نہ ہوگی۔ مثلاً فقیر کو زکوٰۃ کی نیت سے کھانا کھلادیا تو زکوٰۃ ادا نہ ہوگی۔ اس لئے کہ یہ مالک کردینا نہ ہوا۔ ہاں اگر کھانا دیدے کہ کھالے یا لے جائے تو ادا ہوگئی، یونہی زکوٰۃ کی نیت سے کپڑا دے دیا تو ادا ہوگئی۔

زکوٰۃ کا مال کسی کی مِلک کرنے میں کس چیز کا خیا ل رکھا جائے؟

مسئلہ: مالک کرنے میں یہ بھی ضروری ہے کہ ایسے کو زکوٰۃ دے جو قبضہ کرنا جانتا ہو یعنی ایسا نہ ہو جو پھینک دے یا دھوکا کھائے ورنہ ادا نہ ہوگی۔ جیسے چھوٹے بچے یا پگل کو زکوٰہ دینے سے ادا نہ ہوگی۔ جس بچے کو اتنی عقل نہ ہو تو اس کی طرف سے اس کا باپ جو فقیر ہو وہ قبضہ کرلے اس بچے کو وصی یا وہ کہ یہ بچہ جس کی نگرانی میں ہے، وہ قبضہ کرلے۔

سونے چاندی مالِ تجارت کی زکوۃ کا بیان

زکوٰۃ کیلئے سونے چاندی کا کیا نصاب ہے؟

مسئلہ: سونے کا نصاب بیس مثقال ہے یعنی ساڑھے سات تولے اور چاندی کا دو سو درہم یعنی ساڑھے باون تولے۔

اگر سونا چاندی موجود نہیں، مال تجارت موجود ہے تو کیا اس پر بھی زکوٰۃ واجب ہوگی؟

مسئلہ: سونے چاندی کے علاوہ تجارت کی کوئی چیز ہو جس کی قیمت سونے چاندی کی نصاب کوپہنچے تو اس پر بھی زکوٰہ واجب ہے ۔ یعنی قیمت کا چالیسواں حصہ اور اگر اسباب کی قیمت تو نصاب کو نہیں پہنچتی مگر اس کے پاس ان کے علاوہ سونا چاندی بھی ہے تو ان کی قیمت سونے چاندی کے ساتھ ملا کر مجموعہ کریں اگر مجموعہ نصاب کو پہنچا تو زکوٰۃ واجب ہے۔ اسباب تجارت کی قیمت سونے کی نصاب کی قیمت سے لگائی تو نصاب نہیں بنتی اور چاندی کی نصاب کی قیمت سے بنائیںتو بن جاتی ہے تو اس سے لگائی جائے جس سے نصاب پوری ہو، جیسے آج کل کے ساڑھے سات تولے سونے کی قیمت میں چاندی کی کئی نصابیں ہوگی۔ لہٰذا مالِ تجارت کو کو چاندی کی نصاب کی قیمت سے لگائیں گے۔

اگر کسی شخص کے پاس سونا بھی ہے اور چاندی بھی مگر دونوں میں سے کوی بھی نصاب کے برابرنہیں تو اب کیا حکم ہے؟

مسئلہ: سونا بھی ہے اور چاندی بھی اور دونوں میں سے کوئی بھی نصاب کے برابر نہیں تو سونے کی قیمت کی چاندی، چاندی میں ملائیں تو نصاب ہوجاتی ہے اور چاندی کی قیمت کا سونا سونے میں ملائیں تو نہیں ہوتی تو واجب ہے کہ جس میں نصاب پوری ہووہ کریں۔

زکوٰۃ کس حساب سے اد اکرے؟

مسئلہ: زکوٰۃ ہر نصاب و خمس نصاب پر چالیسواں حصہ ہے اور مذہب صاحبین پر نہایت آسان اور فقراء کے لئے نافع یہ ہے کہ فی صد ڈھائی روپے سونے اور چاندی کے نصاب سے اگر کچھ زیادہ ہو تو اس کا قاعدہ یہ ہے کہ نصاب کا پانچواں حصہ سے کم زیادتی ہو تو اس زیادتی میں زکوٰۃ نہیں ہے۔ اور جب پانچواں حصہ زیادہ وہگا تو اس میں زکوٰۃ ہوگی مثلاً جس کے پاس ساڑھے سات تولے سونا ہے تو اس پر دو ماشے تین رتی سونا زکوٰۃ میں دینا فرض ہے۔ اس کے بعد ساڑھے سات تولہ کا پانچواں حصہ ڈیڑھ تولہ سے زیادہ ہو یعنی نو تولے سونا ہو جائے تو زکوٰۃ بڑھے گی اور نو تولے سے کم یعنی پونے نو تولے میں بھی وہی زکوٰۃ ہوگی جو ساڑھے دس تولے میں تھی۔ اس طرح نو تولے کی زکوٰۃ ساڑھے دس تولے کی زکوٰۃ سے کم تک رہے گی۔ جب ساڑھے دس تولے ہوجائے گا تو زکوٰۃ بڑھے گی۔ اسی طرح چاندی کے نصاب میں ساڑھے باون تولے کی زکوٰۃ تریسٹھ تولے سے کم تک رہے گی۔ جب تریسٹھ تولے چاندی ہوجائے گی تو زکوٰۃ بڑھے گی۔ (فتاویٰ رضویہ )

کیا کرنسی نوٹ پر بھی زکوٰۃ واجب ہے؟

مسئلہ: نوٹ کی بھی زکوٰۃ واجب ہے ۔ جب تک ان کا رواج اور چلن ہو کہ یہ بھی ثمن اصطلاحی ہیں اور پیسوں کے حکم میں ہیں یعنی ساڑھے باون تولہ چاندی یا ساڑھے سات تولہ سونے کی قیمت کے نوٹ پر زکوٰۃ واجب ہے۔ اور اس کے آگے سونے چاندی کے حساب کے قاعدے سے ہے۔

مالِ تجارت پر زکوٰۃ کس قیمت کے حساب سے اد اکرے؟

مسئلہ: مال تجارت میں سال گزرنے پر جو قیمت ہوگی اس کا اعتبار ہے مگر شرط یہ ہے کہ شروع سال میں اس کی قیمت دو سو درہم سے کم نہ ہو۔

جوسامان کرایہ پر دینے کیلئے خریدا گیا کیا اس پر بھی زکوٰۃ واجب ہے؟

مسئلہ: جو سامان کرایہ پر دینے کے لئے خریدا گیا اس کو بیچنا مقصود نہ ہو تو اس کی قیمت پر زکوٰۃ واجب نہیں۔ اسی طرح ہر وہ چیز جس کو بیچنا مقصود نہ ہو بلکہ اس کے ذریعے سے آمدنی کرنا مقصود ہو تو اس کی قیمت پر زکوٰہ نہیں، مثلاً کاریگروں کی مشین کرایہ پر چلانے والوں کی بس، ٹیکسی وغیرہ۔

کیا زکوٰۃ زمین، مکان، دکان پر بھی واجب ہے؟

مسئلہ: اگر کسی شخص نے زمین، مکان یا دکان اس نیت سے خریدی کہ اس کو بیچے گا تو اس پر زکوٰۃ واجب ہے ، اگر بیچنے کی نیت سے یہ چیزیں نہیں خریدیں تو اس پر زکوٰۃ واجب نہیں ہے۔

کیا نا بالغ بچیوں کیلئے جو زیور بنایا گیا اس پر بھی زکوٰۃ واجب ہے؟

مسئلہ: نابالغ لڑکیوں کا جو زیور بنایا گیا اور انہیں ابھی مالک نہ کیا گیا بلکہ اپنی ہی ملکیت میں رکھا اور ان کے پہننے کے استعمال میں آتا ہے اگرچہ نیت یہ ہو کہ ان کا بیاہ ہونے پر جہیز میں دیں گے، اگر تنہا وہ زیور یا وہ دوسرے مال کے ساتھ نصاب کے برابر ہے تو اسی مالک پر زکوٰۃ واجب ہے۔ اگر وہ زیور نا بالغ لڑکیوں کی ملکیت بنا دیا گیا تو اس کی زکوٰۃ کسی پر واجب نہیں۔ والدین پر اس لئے نہیں کہ وہ ان کی ملکیت نہیں اور لڑکیوں پر اس لئے نہیں کہ وہ نا بالغہ ہیں۔

سائمہ کی زکوۃ کا بیان

تین قسم کے جانوروں میں زکوٰۃ واجب ہے جب کہ سائم ہوں، اونٹ، بکری گائے ، سائمہ وہ جانور ہے جو سال کے زیادہ تر حصے چر کر گزارا کرتا ہو اور اس سے مقصود صرف دودھ اور بچے لینا یا فربہ کرنا ہے۔
اونٹ کی زکوۃ: پانچ اونٹ سے کم میں زکوٰۃ واجب نہیں او رجب پانچ یا پانچ سے زیادہ ہوں، مگر پچیس سے کم ہوں تو ہر پانچ میں ایک بکری واجب ہے یعنی پانچ ہوں تو ایک بکری دس ہوں تو دو بکری و علی ھذا القیاس۔

مسئلہ: زکوٰۃ میں جو بکری دی جائے وہ سال بھر سے کم کی نہ ہو، بکری یا بکرا جو چاہیں۔

مسئلہ: دو نصابوں کے درمیان میں جو ہوں وہ عفو ہیں، یعنی ان کی کچھ زکوٰۃ نہیں۔

مثلاً سات آٹھ ہوں، جب بھی وہی ایک بکری ہے۔

مسئلہ: پچیس اونٹ ہوں تو ایک بنت مخاض دیں۔ ( یعنی ایک سال سے کچھ زائد عمری کی اونٹنی ) پینتیس تک یہی حکم ہے یعنی وہی ایک بنت مخاض دیں۔ چھتیس سے پینتالیس تک میں ایک بنت لبون (یعنی دو سال سے کچھ اوپر کی اونٹنی) چھیالیس سے ساٹھ تک میں ایک حقہ (تین سال سے کچھ اوپر کی اونٹنی) اکسٹھ سے پچتھر تک ایک جذعہ (یعنی چار سال سے کچھ اوپر کی اونٹنی) چھہتر سے نوے تک دو بنت لبون۔
اکیانوے سے ایک سو بیس تک میں دو حقہ۔ اس کے بعد ایک سو پینتالیس تک دو حقہ اور ہر پانچ میں ایک بکری مثلاً ایک سو پچیس میں دو ایک بکری اور ایک سو تیس میں دو حقہ دو بکریاں و علی ہذا القیاس۔ پھر ایک سو پچاس میں تین حقہ اگر اس سے زیادہ ہوں تو ان میں ویسا ہی کریں، جیسا شروع میں کیا تھا۔ یعنی ہر پانچ پر ایک بکری اور پچیس میں بنت مخاض۔ چھتیس میں بنت لبون یہ ایک سو بچانوے تک کا حکم ہوگا۔ یعنی اتنے میں تین حقہ اور ایک بنت لبون پھر ایک سو چھیانوے سے دو سو تک چار حقہ اور یہ بھی اختیار ہے کہ پانچ بنت لبون دے دیں ۔ پھر دو سو کے بعد وہی طریقہ برتیں۔ جو ایک سو پچاس کے بعد ہے ۔ یعنی ہر پانچ پر ایک بکری پچیس میں بنت مخاض ۔ چھتیس میں بنت لبون۔ پھر دو سو چھیالیس سے دو سو پچاس تک پانچ حقہ و علی ہذا القیاس۔

مسئلہ: اونٹ کی زکوٰۃ میں جو اونٹ کا بچہ دیا جاتا ہے تو ضرور ی ہے کہ وہ مادہ ہو نر دیں تو مادہ کی قیمت کا ہو ورنہ نہیں لیا جائے گا۔

گائے بھینس کی زکوۃ

مسئلہ: تیس سے کم گائیں ہوں تو زکوٰۃ واجب نہیں تیس پوری ہوں تو ان کی زکوٰۃ میں ایک تبیع (یعنی سال بھر کا بچھڑا) یا تبیعہ (یعنی سال بھر کی بچھیا) ہے اور چالیس ہوں تو ایک مُسِن (یعنی دو سال کا بچھڑا) یا مُسِنہ (یعنی دو سال کی بچھیا) انسٹھ تک میں یہی حکم ہے۔ پھر ساٹھ میں دو تبیع یا تبیعہ پھر ہر تیس میں ایک تبیع یا تبیعہ اور چالیس میں ایک مُسِن اور اسی میں دو مُسِن، وعلی ہذا القیاس۔

مسئلہ: گائے بھینس کا ایک حکم ہے اور اگر دونوں ہوں تو ملا لیں، جیسے بیس گائیں اور دس بھینس تو زکوٰۃ واجب ہوگی۔ اور زکوٰۃ میں اس کا بچہ لیا جائے گا۔ جو زیادہ ہوں یعنی گائے زیادہ ہوں تو گائے کا بچہ اور بھینس زیادہ ہو تو بھینس کا بچہ اور کوئی زیادہ نہ ہو تو زکوٰۃ میں وہ بچہ لیں جو متوسط درجہ کا ہو۔

مسئلہ: گائے بھینس کی زکوٰۃ میں اختیار ہے کہ نر لیا جائے یا مادہ، مگر افضل یہ ہے کہ گائے زیادہ ہوں تو بچھیا اور نر زیادہ ہوں تو بچھڑا۔

بھیڑ/بکری کی زکوۃ

چالیس سے کم بھیڑ بکریاں ہوں تو زکوٰۃ واجب نہیں اور چالیس ہوں تو ایک بکری اور یہی حکم ایک سو بیس تک ہے یعنی ان میں بھی وہی ایک بکری ہے اور ایک سو اکیس میں دو بکریاں اور دو سو ایک میں تین بکریاں اور چار سو میں چاربکریاں پھر ہر سو پر ایک بکری اور جو دو نصابوں کے بیچ میں ہے اس کی زکوٰۃ معاف ہے۔

مسئلہ: زکوٰۃ میں اختیار ہے کہ بکری دے یا بکرا جو کچھ بھی ہو یہ ضرور ہے کہ سال بھر سے کم کا نہ ہو۔ اگر کم ہو تو قیمت کے حساب سے دیا جاسکتا ہے۔

مسئلہ: بھیڑ ، دنبہ، بکری میں داخل ہے کہ ایک قسم سے نصاب پوری نہ ہو تو دوسری قسم کو ملا کر لیں اور زکوٰۃ میں بھیڑ دنبہ بھی دے سکتے ہیں مگر سال بھر سے کم کے نہ ہوں۔

مسئلہ: اگر کسی کے پاس اونٹ گائے ، بکریاں سب ہیں مگر نصاب کسی کا پورا نہیں تو نصاب پورا کرنے کے لئے ملائے نہ جائیں اور زکوٰۃ واجب نہ ہوگی۔

مسئلہ: گھوڑے ، گدے، خچر، اگرچہ چرائی پر ہوں تو ان کی زکوٰۃ نہیں۔ ہاں اگر تجارت کے لئے ہوں تو ان کی قیمت لگا کر اس کا چالیسواں حصہ زکوٰۃ میں دیں۔

زکوۃ کن لوگوں کو دینا جائز ہے

مسئلہ : زکوٰۃ کے مصارف سات ہیں:
۱) فقیر ۲) مسکین ۳) عامل ۴) رقاب ۵) غارم ۶) فی سبیل اللہ ۷) ابن السبیل

قفیر سے کیا مراد ہے ؟

مسئلہ: فقیر وہ آدمی ہے جس کے پاس کچھ نہ ہو مگر نہ اتنا کہ نصاب کو پہنچ جائے یا نصاب کے برابر ہو تو اس کی حاجت اصلیہ میں مستغرق ہو (جیسے رہنے کا مکان ، پہننے کے کپڑے ، خدمت کی لونڈی، غلام، پیشے کے اوزار وغیرہ) جو ضرورت کی چیزیں چاہے کتنی ہی قیمتی ہوں یا اتنے کا قرض دار ہو کہ قرض نکالنے کے بعد جو بچے وہ نصاب کے برابر نہ ہو تو فقیر ہے اگرچہ اس کے پاس ایک تو کیا کئی نصابیں ہوں۔

مسکین سے کیا مراد ہے؟

مسئلہ: مسکین وہ ہے جس کے پاس کچھ نہ ہو، یہاں تک کہ کھانے اور بدن چھپانے کے لئے اس کا محتاج ہے کہ لوگوں سے سوال کرے۔

کیا فقیر و مسکین کو سوال کرنا جائز ہے؟

مسئلہ: مسکین کو سوال حلال ہے اور فقیر کو سوال ناجائز ۔ اس لئے کہ اس کے کھانے کو اور بدن چھپانے کو ہے۔ اسے بغیر ضرورت و مجبوری کے سوال حرام ہے۔

عامل کسے کہتے ہیں؟

مسئلہ: عامل وہ ہے جسے بادشاہِ اسلام نے زکوٰۃ و عشر وصول کرنے کے لئے مقرر کیا ہو، اسے کام کے لحاظ سے اتنا دیا جائے کہ اس کو اور اس کے مدد گاروں کو متوسط طور پر کافی ہو، مگر اتنا نہ ہوجائے کہ جو وصول کرکے لایا، اس کے آدھے سے زیادہ ہو۔

فی سبیل اللہ خرچ کرنے سے کیا مراد ہے؟

مسئلہ: فی سبیل اللہ یعنی اللہ کی راہ میں خرچ کرنا اس کی کئی صورتیں ہیں، جیسے کوئی جہاد میں جانا چاہتا ہے اور سامان اس کے پاس نہیں تو زکوٰۃ کا مال دے سکتے ہیں، اگرچہ وہ کما سکتا ہو ۔ یا کوئی حج کو جانا چاہتا ہے اور اس کے پاس مال نہیں اس کو زکوٰۃ دے سکتے ہیں، مگر اسے حج کے لئے سوال کرنا جائز نہیں۔ یا طالب علم جو علم دین پڑھتا ہے اسے بھی زکوٰۃ دے سکتے ہی ۔ بلکہ یہ طالب علم سوال کرکے بھی مال زکوٰۃ لے سکتا ہے جب اس نے اپنے آپ کو اسی کام کے لئے فارغ کر رکھا ہو ، اگرچہ کما سکتا ہو یعنی ہر نیک کام کے لئے زکوٰۃ خرچ کرنا فی سبیل اللہ ہے جبکہ بطور تملیک ہو بغیر تملیک کے زکوٰۃ ادا نہیں ہوسکتی۔

کیا زکوٰۃ کا مال اسلامی مدرسوں میں دیا جاسکتا ہے؟

مسئلہ: بہت سے لوگ زکوٰۃ کا مال اسلامی مدرسوں میں بھیج دیتے ہیں ان کو چاہیے کہ متولی مدرسہ کو بتادیں کہ یہ زکوٰۃ ہے ۔ تاکہ متولی اس کو الگ رکھے اور دوسرے مال میں نہ ملائے ۔ اور غریب طلباء پر خرچ کرے کسی کام کی اجرت میں نہ دے دے ورنہ زکوٰۃ ادا نہ ہوگی۔

کیا زکوٰۃ کا مال مسافر کو دے سکتے ہیں؟

مسئلہ: ابن السبیل یعنی مسافر جس کے پاس مال نہ رہا ، وہ زکوٰۃ لے سکتا ہے اگرچہ گھر پر مال موجود ہو، مگر اتنا ہی لے جس سے ضرورت پوری وہجائے، زیادہ کی ضرورت نہیں ۔

کیا زکوٰۃ کا مال ادا کرنے میں صرف اباحت کافی ہے؟

مسئلہ: زکوٰۃ ادا کرنے میں یہ ضروری ہے کہ جسے دیں اسے مالک بنادیں اباحت کافی نہیں۔ لہٰذا زکوٰۃ کا مال مسجد میں لگانا یا اس سے میت کو کفن دینا یا میت کا دین ادا کرنا یا غلام آزاد کرنا ، پل یا سڑک بنوادینا۔ نہر یا کنواں کھدوادینا۔ ا ن چیزوں میں خرچ کر نا یا کتاب وغیرہ کوئی چیز خرید کر وقف کردینا کافی نہیں اس سے زکوٰۃ ادا نہ ہوگی۔ جب تک کسی فقیر کو مالک نہ بنادیں۔ البتہ فقیر زکوٰۃ کے مال کے مالک ہوجانے کے بعد خود اپنی طرف سے ان کاموں میں خرچ کرے تو کرسکتا ہے۔

کن لوگوں کو زکوٰۃ نہیں دے سکتے؟

مسئلہ: اپنی یعنی ماں باپ دادا دادی، نانا نانی وغیرہ ۔ ہم جن کی اولاد میں یہ ہے اور اپنی اولاد (یعنی بیٹا، بیٹی، پوتا، پوتی، نواسا، نواسی وغیرہ ہم) کو زکوٰۃ نہیں دے سکتا۔ یونہی صدقہ فطر و نذر شرعی و کفارہ بھی نہیں دے سکتا۔ رہا صدقہ نفل تو وہ دے سکتا ہے، بلکہ بہتر ہے۔

کیا بہو ، داماد، سوتیلی ماں کو زکوٰۃ دے سکتے ہیں؟

مسئلہ: بہو، داماد اور سوتیلی ماں یا سوتیلے باپ یا زوجہ کی اولاد یا شوہر کی اولاد کو زکوٰۃ دے سکتا ہے اور رشتہ داروں میں جس کا نفقہ اس کے ذمہ واجب ہے اسے زکوٰۃ دے سکتا ہے۔جب کہ نفقہ میں محسوب نہ کرے۔

کیا بیوی شوہر کو، شوہر بیوی کو زکوٰۃ دے سکتا ہے؟

مسئلہ: بیوی شوہر کو اور شوہر بیوی کو زکوٰۃ نہیں دے سکتا البتہ طلاق دینے کے بعد جب کہ عدت پوری ہوچکی ہو تو بعد عدت ختم ہونے کے دے سکتا ہے۔

کیا کسی غنی کی بیوی کو زکوٰۃ دے سکتے ہیں؟

مسئلہ: غنی کی بیوی کو زکوٰۃ دے سکتے ہیں جب کہ نصاب کی مالک نہ ہو، یونہی غنی کے باپ کو زکوٰۃ دے سکتے ہیں جب کہ فقیر ہو۔

کیا غنی مرد کے نابالغ اور بالغ بچوں کو زکوٰۃ دے سکتے ہیں ؟

مسئلہ: غنی مرد کے نابالغ بچے کو زکوٰۃ نہیں دے سکتے اور غنی کی بالغ اولاد کو دے سکتے ہیں جب کہ یہ فقیر ہوں۔

کن لوگوں کو زکوٰہ دینا واجب نہیں؟

مسئلہ: جو شخص حاجت اصلیہ کے علاوہ نصاب کا مالک ہو اس کو زکوٰۃ دینا جائز نہیں یعنی حاجت اصلیہ کے سامان کے علاوہ اتنا مال ہو کہ اس کی قیمت دو سو درہم ہو جائے خود اس مال پر زکوٰۃ واجب نہ ہو، مثلاً چھ تولہ سونا جب دو سو درہم کی قیمت کا ہو تو جس کے پاس یہ ہے اگرچہ اس پر زکوٰۃ واجب نہیں کہ سونے ے نصاب ساڑھے سات تولے مگر اس شخص کو زکوٰۃ نہیں دے سکتے یا مثلاً جس کے پاس بیس گائے ہیں، جن کی قیمت دو سو درہم ہے تو اس کو زکوٰۃ نہیں دے سکتے اگرچہ بیس گایوں پر زکوٰۃ واجب نہیں۔

حاجت اصلیہ کی مختلف صورتیں کیا ہیں؟

مسئلہ: مکان ، سامان خانہ داری ، پہننے کے کپڑے ، خادم، سواری کاجنور، ہتھیار، اہل علم کے لئے کتابیں جو اس کے کام میں ہوں، یہ سب حاجت اصلیہ میں سے ہیں۔

کیا تندرست صحیح شخص کو زکوٰۃ دے سکتے ہیں؟

مسئلہ : صحیح تندرست کو زکوٰۃ دے سکتے ہیں اگرچہ کمانے پر قدرت رکھتا ہو مگر سوال کرنا اسے جائز نہیں

کیا موتی ہیرا وغیرہ جواہر پر زکوٰۃ ہے؟

مسئلہ: موتی ہیرا وغیرہ جواہر جس کے پاس ہوں اور تجارت کے لئے نہ ہوں تو ان کی زکوٰۃ واجب نہیں، مگر جب نصاب کی قیمت کے ہوں تو زکوٰۃ لے نہیں سکتا۔

کیا بنی ہاشم کو زکوٰۃ دے سکتے ہیں؟

مسئلہ: بنی ہاشم کو زکوٰۃ نہیں دے سکتے ۔ بنی ہاشم سے یہاں مراد حضرت علی، حضرت جعفر، حضرت عباس، حضرت عقیل اور حضرت حارث ابن مطلب رضی اللہ عنہم کی اولاد ہیں۔

اگر کسی شخص کی ماں ہاشمی ہو لیکن باپ ہاشمی نہ ہو تو کیا اس شخص کو زکوٰۃ دے سکتے ہیں؟

مسئلہ: ماں ہاشمی بلکہ سیدانی ہو اور باپ ہاشمی نہ ہو تو ہاشمی نہیں، اس لئے کہ شرع میں نسب باپ سے ہے لہٰذا ایسے شخص کو زکوٰۃ دے سکتے ہیں جبکہ نہ دینے کی کوئی اور وجہ نہ ہو۔

کس آمدنی سے بنی ہاشم کی مدد کرنا جائز ہے؟

مسئلہ: صدقہ نفل اور وقف کی آمدنی بنی ہاشم کو دے سکتے ہیں۔

جس شخص کو زکوٰۃ دی جائے کیا اس کے لئے فقیر ہونا شرط ہے؟

مسئلہ: جن لوگوں کی نسبت بیان کیا گیا کہ انہیں زکوٰۃ دے سکتے ہیں ان سب کا فقیر ہونا شرط ہے سوا عامل کے کہ اس کے لئے فقیر ہونا شرط نہیں اور ابن السبیل اگرچہ غنی ہو، حالت سفر میں جب کہ مال نہ ہو تو وہ بھی فقیر کے حکم میں ہے باقی کسی کو جو فقیر نہ ہو زکوٰۃ نہیں دے سکتے۔

تحری سے کیا مراد ہے ؟

مسئلہ: جس نے تحری کی یعنی سوچا اور دل میں یہ بات جمی کہ اس کو زکوٰۃ دے سکتے ہیں اور زکوٰۃ دے دی، بعد میں معلوم ہوا کہ وہ مصرف زکوٰۃ ہے یا کچھ حال نہ کھلا تو ادا ہوگئی۔

اگر بے سوچے سمجھے زکوٰۃ دی بعد میں معلوم ہوا کہ اسے زکوٰۃ نہیں دے سکتے تھے تو کیا حکم ہے؟

مسئلہ: اگر بے سوچے سمجھے دے دی یعنی یہ خیال بھی نہ آیا کہ اسے دے سکتے ہیں یا نہیں۔ اور بعد میں معلوم ہوا کہ اسے زکوٰۃ نہیں دے سکتے تھے تو ادا نہ ہوئی، ورنہ ہوگئی۔

کن لوگوں کو زکوٰۃ دینا افضل ہے؟

مسئلہ: زکوٰۃوغیرہ صدقات میں افضل یہ ہے کہ پہلے اپنے بھائیوں، بہنوں کو دے۔ پھر ان کی اولاد کو پھر چچا اور پھوپھیوں کو پھر ان کی اولاد کو پھر ماموں کو، پھر خالہ کو پھر ان کی اولاد کو پھر اپنے گائوں یا شہر کے رہنے والوں کو۔ حدیث میں ہے کہ اللہ تعالیٰ اس شخص کے صدقے کو قبول نہیں فرماتا جس کے رشتہ داراس کے سلوک کرنے کے محتاج ہوں اور یہ غیروں کو دے۔

کیا بد مذہب کو زکوٰۃ دینا جائز ہے؟

مسئلہ: بد مذہب کو زکوٰۃ دینا جائز نہیں اور اسی طرح ان مرتدین کو بھی دینے سے ادا نہ ہوگی۔ جو زبان سے تو اسلام کا دعویٰ کرے لیکن خدا اور رسول صلی اللہ تعالیٰ علیہ وسلم کی شان گھٹائے یا کسی اور دینی امر کا انکار کرتے ہیں۔

کن لوگوں کو سوال کرنا حلال ہے؟

مسئلہ: جس کے پاس آج کے کھانے کو ہے یا تندرست ہے کہ کما سکتا ہے اسے کھانے کے لئے سوال حلال نہیں۔ اور بے مانگے کوئی خود دے دے تو لینا جائز ہے اور کھانے کو اس کے پاس ہے مگر کپڑا نہیں تو کپڑے کے لے سوال کرسکتا ہے یونہی اگر جہاد یا طالب علم دین میں لگا ہے تو اگرچہ تندرست اور کمانے کے لائق ہو اسے سوال کی اجازت ہے۔

بھیک مانگنا کیسا فعل ہے؟

مسئلہ: بھیک مانگنا بہت ذلت کی بات ہے بغیر ضرورت سوال نہ کرے۔ حدیث سے ثابت ہے کہ بے ضرورت سوال کرنا حرام ہے کہ سوال کرنے والا حرام کھاتا ہے۔ رسول اللہ صلی اللہ تعالیٰ علیہ وسلم نے فرمایا جو سوال سے بچنا چاہے گا اللہ تعالیٰ اسے بچائے گا اور جو غنی بننا چاہے گا اللہ تعالیٰ اسے غنی کردے گا اور جو صبر کرنا چاہے گا اللہ تعالیٰ اسے صبر دے گا اور فرمایا جو بندہ سوال کا دروازہ کھولے گا اللہ تعالیٰ اس پر محتاجی کا دروازہ کھولے گا اور فرمایا کہ جو سوال کرے اور اس کے پاس اتنا سونا ہے کہ جو اسے بے پروا کرے تو وہ آگ کی زیارت چاہتا ہے لوگوں نے عرض کیا وہ کتنا ہے جس کے ہوتے سوال جائز نہیں، فرمایا صبح و شام کا کھانا۔ (ابو دائود، ابن حبان، ابن خزیمہ)

کیا کینسر ہسپتالوں یا فلاحی اداروں میں زکوٰۃ کی رقوم ادا کی جاسکتی ہے؟

مسئلہ: زکوٰۃ کی رقوم صرف اور صرف مسلمان پر خرچ کی جاسکتی ہے۔ ہمارے ہاں بڑے ہسپتالوں میں اور فلاحی اداروں میں اس چیز کا خیال نہیں رکھا جاتا کہ مریض یا غریب و نادار کا فنڈ خرچ کردیا جاتا ہے ، لہٰذا اس صورت میں زکوٰۃ ادا نہ ہوگی۔ اگر زکوٰۃ کی رقم واقعی کسی مریض کو دیناچاہتے ہیں یا کسی غریب نادار انسان کو دینا چاہتے ہیں تو خود ہسپتالوں میں جا کر تحقیق کرنے کے بعد جو زکوٰۃ کا صحیح حقدار صحیح العقیدہ مسلمان مریض ہو، اس کو ادا کردی جائے۔ اس طرح زکوٰۃ ادا ہوجائے گی۔ یہی حکم فلاحی اداروں کے لئے ہے۔

بینکوں کی طرف سے جو زکوٰۃ کی کٹوتی ہوتی ہے ، کیا اس سے زکوٰۃ ادا ہوجاتی ہے؟

مسئلہ: بینکوں کی طرف سے جو زکوٰۃ کی کٹوتی ہوتی ہے اس سے زکوٰۃ ادا نہیں ہوتی۔

اعتکاف ۔۔۔۔فضائل ، مسائل اور احکام

---

قرآن کریم و احادیث مبارکہ کی روشنی میں اعتکاف کی اہمیت

قرآن کریم میں اللہ تبارک و تعالیٰ کا فرمان ہے:
 وَ لَا تُبَاشِرُوۡہُنَّ وَ اَنۡتُمۡ عٰکِفُوۡنَ ۙ فِی الۡمَسٰجِدِ (البقرۃ: ۱۸۷)

ترجمہ: ’’عورتوں سے مباشرت نہ کرو جب کہ تم مسجدوں میں اعتکاف کئے ہوئے ہو‘‘۔

بخاری اور مسلم میں حضرت سیدہ ام المومنین عائشہ صدیقہ رضی اللہ تعالیٰ عنہما سے مروی ہے:

’’رسول اللہ صلی اللہ علیہ وسلم رمضان المبار ک کے آخری عشرے کا اعتکاف فرمایا کرتے تھے‘‘۔

ابو داؤد شریف میں حضرت عائشہ رضی اللہ تعالیٰ عنہما ہی سے روایت ہے آپ فرماتی ہیں کہ:

’’ معتکف پر سنت (یعنی حدیث شریف سے ثابت) یہ ہے کہ معتکف نہ مریض کی عیادت کو جائے نہ جنازہ میں حاضر ہو، نہ عورت کو ہاتھ لگائے اور نہ اس سے مباشرت کرے اور نہ کسی حاجت کے لئے جائے مگر اس حاجت کے لئے جاسکتا ہے جو ضروری ہے اور اعتکاف بغیر روزہ کے نہیں ور اعتکاف جماعت والی مسجد میں کرے‘‘۔

ابنِ ماجہ ابن عباس رضی اللہ تعالیٰ عنہما سے راوی ہے کہ:

’’رسول اللہ صلی اللہ علیہ وسلم نے معتکف کے بارے میں فرمایا وہ گناہوں سے باز رہتا ہے اور نیکیوں سے اسے اس قدر ثواب ملتا ہے جیسے اس نے تمام نیکیاں کیں‘‘۔

اعتکاف کے شرعی معنی:

اللہ تبارک و تعالیٰ کی رضا کے لئے مسجد میں نیت کے ساتھ ٹہرنا اعتکاف ہے۔ اور اس کے لئے مسلمان عاقل اور جنابت و حیض و نفاس سے پاک ہونا شرط ہے۔ بلوغ شرط نہیں بلکہ ایسا نابالغ جو تمیز رکھتا ہے اگر اعتکاف کی نیت کے ساتھ مسجد میں ٹھہرے تو یہ اعتکاف صحیح ہے۔

اعتکاف کس مسجد میں ہوسکتا ہے؟

مسئلہ: مسجد جامع ہونا اعتکاف کے لئے شرط نہیں بلکہ مسجد جماعت میں بھی ہوسکتا ہے مسجد جماعت وہ ہے جس میں امام و موذن مقرر ہوں۔ اگرچہ اس میں پنجگانہ جماعت نہ ہوتی ہو اور آسانی اس میں ہے کہ مطلقاً ہر مسجد میں اعتکاف صحیح ہے۔ اگرچہ وہ مسجد جماعت نہ ہو خصوصاً اس زمانہ میں کہ بہتیری مسجدیں ایسی ہیں کہ جن میں نہ امام ہیں نہ موذن۔ (رد المختار)

مسئلہ: سب سے افضل مسجد حرم شریف میں اعتکاف ہے پھر مسجد نبوی میں۔ علیٰ صاحبہ الصلوٰۃ والتسلیم، پھر مسجد اقصیٰ میں پھر اس میں جہاں بڑی جماعت ہوتی ہو۔(جوہر)

عورت اعتکاف کس جگہ کرے؟

مسئلہ: عورت کو مسجد میں اعتکاف مکروہ ہے بلکہ وہ گھر میں ہی اعتکاف کرے مگر اس جگہ کرے جو اس نے نماز پڑھنے کے لئے مقرر کر رکھی ہے، جسے مسجدبیت کہتے ہیں اور عورت کے لئے یہ مستحب بھی ہے کہ گھر میں نمازپڑھنے کے لئے کوئی جگہ مقرر کرلے اور چاہیے کہ اس جگہ کو پاک صاف رکھے اور بہتر یہ ہے کہ اس جگہ کو چبوترے وغیرہ کی طرح بلند کرلے بلکہ مرد کو بھی چاہیے کہ نوافل کے لئے گھر میں کوئی جگہ مقرر کرلے کہ نفل نماز گھر میں پڑھنا افضل ہے (در مختار، رد المختار)

مسئلہ: اگر عورت نے نماز کے لئے کوئی جگہ مقرر نہیں کررکھی ہے تو گھر میں اعتکاف نہیں کرسکتی البتہ اگر اس وقت یعنی جب کہ اعتکاف کا ارادہ کیا کسی جگہ کو نماز کے لئے خاص کرلیاتو اس جگہ اعتکاف کرسکتی ہے ( در مختار ، رد المختار)

کیا خنثیٰ مسجد بیت میں اعتکاف کرسکتا ہے؟

مسئلہ: خنثیٰ مسجد بیت میں اعتکاف نہیں کرسکتا۔ (در مختار)

اعتکاف کی اقسام

اعتکاف کی تین قسمیں ہیں:

۱۔ واجب کہ اعتکاف کی منت مانی یعنی زبان سے کہا محض دل میں ارادہ ہے واجب نہ ہوگا۔

۲۔سنت مئوکدہ کہ رمضان کے پورے عشرے اخیر یعنی آخر کے دس دن میں اعتکاف کیا جائے ، یعنی بیسویں رمضان کو سورج ڈوبتے وقت بہ نیت اعتکاف مسجد میں ہو اور تیسویں کے غروب کے بعد یا انتیس کو چاند ہونے کے بعد نکلے ۔ اگر بیسویں تاریخ کو بعد نماز مغرب نیت اعتکاف کی تو سنت موکدہ ادا نہ ہوئی اور یہ اعتکاف سنت کفایہ ہے کہ اگر سب ترک کردیں تو سب سے مطالبہ ہو گا اور شہر میں ایک نے کرلیا تو سب بری الذمہ۔ ان دو کے علاوہ اور جو اعتکاف کیا جائے وہ مستحب و سنت غیر موکدہ ہے (در مختار، عالمگیری)

۳۔اعتکاف مستحب کے لئے نہ روزہ شرط ہے نہ اس کے لئے کوئی خاص وقت مقرر بلکہ جب مسجد میں اعتکاف کی نیت کی جب تک مسجد میں ہے معتکف ہے چلا آیا اعتکاف ختم ہو گیا (عالمگیری وغیرہ)

کیا اعتکاف کیلئے روزہ رکھنا شرط ہے؟

مسئلہ: اعتکاف سنت یعنی رمضان شریف کی پچھلی دس تاریخوں میں جو کیا جاتا ہے اس میں روزہ شرط ہے لہٰذا اگر کسی مریض یا مسافر نے اعتکاف تو کیا مگر روزہ نہ رکھا تو سنت ادا نہ ہوئی بلکہ نفل ہوا۔ (رد المختار)

معتکف کا اعتکاف کے دوران مسجد سے بلا عذر نکلنا کیسا ؟

مسئلہ: اعتکاف واجب میں معتکف کو مسجد سے بغیر عذر نکلنا حرام ہے اگر نکلا تو اعتکاف جاتا رہا اگرچہ بھول کر نکلا ہو۔ یوں ہی یہ اعتکاف سنت بھی بغیر عزر نکلنے سے جاتا رہتا ہے۔ یوں ہی عورت نے مسجد بیت میں اعتکاف واجب یا مسنون کیا تو بغیر عذر وہاں سے نہیں نکل سکتی اگر وہاں سے نکلی اگرچہ گھر ہی میں رہی اعتکاف جاتا رہا۔ (عالمگیری، رد المحتار)

معتکف کے مسجد سے نکلنے کے جائز عذر کیا ہیں؟

مسئلہ: معتکف کے مسجد سے نکلنے کے دو عذر ہیں ایک حاجت طبعی کہ مسجد میں پوری نہ ہوسکے جیسے پاخانہ ، پیشاب، استنجا، وضو اور غسل کی ضرورت ہو تو غسل مگر غسل و وضو میں یہ شرط ہے کہ مسجد میں نہ ہوسکیں یعنی کوئی ایسی چیز نہ ہو جس میں وضو یا غسل کا پانی لے سکے اس طرح کہ مسجد میں پانی کی کوئی بوند نہ گرے کہ وضو و غسل کا پانی مسجد میں گرانا ناجائز ہے۔ اگر مسجد میں وضو اور غسل کے لئے جگہ بنی ہو یا حوض ہو تو باہر جانے کی اب اجازت نہیں۔ دوم: حاجت شرعی مثلاً عید یا جمعہ کے لئے جانا یا اذان کہنے کے لئے موذن کا مینار پر جانا جبکہ مینار پر جانے کے لئے باہر ہی سے راستے ہوں اور اگر مینار کا راستہ اندر سے ہو تو غیر موذن بھی مینار پر جاسکتا ہے، موذن کی تخصیص نہیں ۔ (در مختار، رد المحتار)

مسئلہ: قضائے حاجت کو گیا تو طہار ت کرکے فوراً چلا آئے ٹھہرنے کی اجازت نہیں اور اگر معتکف کا مکان مسجد سے دور ہے اور اس کے دوست کا مکان قریب تو یہ ضروری نہیں کہ دوست کے یہاں قضائے حاجت کو جائے بلکہ اپنے مکان پر بھی جاسکتا ہے اور اگر اس کے خود دو مکان ہیں ایک نزدیک دوسرا دور تو نزدیک والے مکان میں جائے بعض مشائخ فرماتے ہیں دور والے میں جائے گا تو اعتکاف فاسد ہوجائے گا۔ (رد المحتار،عالمگیری)

مسئلہ: جمعہ اگر قریب کی مسجد میں ہوتا ہے تو آفتاب ڈھلنے کے بعد اس وقت جائے کہ اذان ثانی سے پیشتر سنتیں پڑھ لے اور اگر دور ہو تو آفتاب ڈھلنے سے پہلے بھی جاسکتا ہے مگر اس انداز سے جائے کہ اذان ثانی کے پہلے سنتیں پڑھ سکے زیادہ پہلے نہ جائے اور یہ بات اس کی رائے پر ہے جب اس کی سمجھ میں آجائے کہ پہنچنے کے بعد صرف سنتوں کا وقت رہے گا چلا جائے اور فرض جمعہ کے بعد چار یا چھ رکعتیں سنتوں کی پڑھ کر چلا آئے اور ظہر احتیاطی پڑھنی ہے تواعتکاف والی مسجد میں آکر پڑھے۔ اور

اگر پچھلی نشستوں کے بعد واپس نہ آیا وہیں جامع مسجد میں ٹہرا رہا اگرچہ ایک رات دن وہیں رہ گیا اپنا اعتکاف وہیں پورا کیا تو بھی وہ اعتکاف فاسد نہ ہوا مگر یہ مکروہ ہے اور یہ اس صورت میں ہے کہ جس مسجد میں اعتکاف کیا وہاں جمعہ نہ ہوتا ہو۔ (در مختار، رد المحتار)

معتکف نے اعتکاف اگر ایسی مسجد میں کیا جہاں جماعت نہیں ہوتی تو جماعت کیلئے کیا کرے؟

مسئلہ: اگر ایسی مسجد میں اعتکاف کیا جہاں جماعت نہیں ہوتی تو جماعت کے لئے نکلنے کی اجازت ہے (رد المحتار)

متعکف کا حج یا عمرہ کا احرام باندھنا کیسا؟

مسئلہ: اعتکاف کے زمانہ میں حج یا عمرہ کا احرام باندھا تو اعتکاف پورا کرکے جائے اور اگر وقت کم ہے کہ اعتکاف پورا کرے گا تو حج جاتا رہے گا تو حج کو چلا جائے پھر سرے سے اعتکاف کرے ۔ (رد المحتار)

معتکف کو اگر مجبور کرکے مسجد سے نکال دیا جائے تو کہاں جائے؟

مسئلہ: اگر وہ مسجد گر گئی یا کسی نے مجبور کرکے وہاں سے نکال دیا او ر فوراً دوسری مسجد میں چلا گیا تو اعتکا ف فاسد نہ ہوا۔ (عالمگیری)

معتکف کا کسی کو جان بچانے کے لئے گواہی کے لئے، جہاد کے لئے، مریض کی عیادت کے لئے، اور نماز جنازہ کے لئے جانا کیسا؟

مسئلہ: اگر ڈوبنے یا جلنے والے کے بچانے کے لئے مسجد سے باہر گیا یا گواہی دینے کے لئے گیا یا جہاد میں سب لوگوں کا بلاوا ہوا اور یہ بھی نکلا یا مریض کی عیادت یا نماز جنازہ کے لئے گیا اگرچہ کوئی دوسرا پڑھنے والا نہ ہو تو ان سب صورتوں میں اعتکاف فاسد ہوگیا۔ (عالمگیری وغیرہ)

قرض خواہ اگر معتکف کو روک لے تو کیا حکم ہے؟

مسئلہ: پاخانہ پیشاب کے لئے گیا تھا قرض خواہ نے روک لیا۔ اعتکاف فاسد ہوگیا۔(عالمگیری)

معتکف کابھول کر کھانا، گالی گلوچ یا جھگڑا کرنا کیسا؟

مسئلہ: معتکف نے دن میں بھول کر کھالیا تو اعتکاف فاسد نہ ہوا۔ گالی گلوچ یا جھگڑا کرنے سے اعتکاف فاسد نہیں ہوتا مگر بے نور و بے برکت ہوتا ہے۔ (عالمگیری وغیرہ)

کیا معتکف ے سوا کسی کو مسجد میں کھانے پینے اور سونے کی اجازت نہیں؟

مسئلہ: معتکف کے سوا اور کسی کو مسجد میں کھانے پینے، سونے کی اجازت نہیں اور اگر یہ کام کرنا چاہے تو اعتکاف کی نیت کرکے مسجد میں جائے اور نماز پڑھے یا ذکر الٰہی کرے پھر یہ کام کرسکتا ہے۔ (رد المحتار)

معتکف کا مسجد میں خرید و فروخت کرنا کیسا؟

مسئلہ: معتکف کو اپنی یا بال بچوں کی ضرورت سے مسجد میں کوئی چیز خریدنا یا بیچنا جائز ہے بشرطیکہ وہ چیز مسجد میں نہ ہو یا ہو تو تھوڑی ہو کہ جگہ نہ گھیرے اور اگر خریدو فروخت بقصد تجارت ہو تو ناجائز اگرچہ وہ چیز مسجد میں نہ ہو۔ (در مختار، رد المحتار)

معتکف کا غیر ضروری گفتگو کرنا اور چپ رہنا کیسا؟

مسئلہ: معتکف اگر بہ نیت عبادت سکوت کرے یعنی چپ رہنے کو ثواب کی بات سمجھے تو مکروہ تحریمی ہے اور اگر چپ رہنا ثواب کی بات سمجھ کر ہ ہو تو حرج نہیں اور بری بات سے چپ رہا تو یہ مکروہ نہیں بلکہ یہ تو اعلیٰ درجہ کی چیز ہے کیونکہ بری بات زبان سے نہ نکالنا واجب ہے اور جس بات میں ثواب نہ ہو نہ گناہ یعنی مباح بات بھی معتکف کو مکروہ ہے مگر بوقت ضرورت اور بے ضرورت مسجد میں مباح کلام نیکیوں کو ایسے کھا جاتا ہے جیسے آگ لکڑی کو ۔ (در مختار)

معتکف اگر اعتکاف توڑ دے تو کیا حکم ہے؟

مسئلہ: اعتکاف نفل اگر چھوڑ دے تو اس کی قضا نہیں کہ وہیں تک ختم ہو گیا اور اعتکاف مسنون کہ رمضان کی پچھلی دس تاریخوں تک کے لئے بیٹھا تھا اسے توڑا تو جس دن توڑا فقط اس ایک دن کی قضا کرے پورے دس دنوں کی قضا واجب نہیں اور منت کا اعتکاف توڑا تو اگر کسی معین مہینے کی منت تھی تو باقی دنوں کی قضا کرے ورنہ اگر علی الا تصال واجب ہوا تھا تو سرے سے اعتکاف کرے اور علی الاتصال واجب نہ تھا تو باقی کا اعتکاف کرے۔ (رد المحتار)

اعتکاف اگر کسی عذر کی وجہ سے چھوٹے تو کیا حکم ہے؟

مسئلہ: اعتکاف کی قضا صرف قصداًتوڑنے سے نہیں بلکہ اگر عذر کی وجہ سے چھوڑا مثلاً بیمار ہوگیا یا بلا اختیار چھوٹا مثلاً عورت کو حیض یا نفاس آیا یا جنون و بیہوشی طویل طاری ہوئی ان میں بھی قضا واجب ہے اور ان میں اگر بعض فوت ہو تو کل کی قضا کی حاجت نہیں بلکہ بعض کی قضا کردے اور کل فوت ہو اتو کل کی قضا ہے اور منت میں علی الا تصال واجب ہوا تھا تو علی الا تصال کل کی قضا ہے۔ (رد المحتار)

معتکف کا موبائل فون استعمال کرنا کیسا ؟

مسئلہ: معتکف کے لئے لازم ہے کہ وہ موبائل فون کا مسجد میں غیر ضروری استعمال نہ کرے ۔ مسجد کی بجلی موبائل چارج کرنے کے لئے استعمال نہ کرے اور دورانِ نماز و تراویح بند کردے ، اگر مسجد کی بجلی موبائل فون چارج کرنے کے لئے استعمال کرے تو اس کی رقم ادا کرے۔

کیا معتکف مسجد میں ٹیپ ریکارڈ میں نقیہ شریف و علمائے اہلسنّت کی تقاریر سن سکتا ہے؟

مسئلہ: اگر معتکف کو ٹیپ ریکارڈ میں نعت شریف، قرأت یا صحیح العقیدہ علمائے اہلسنّت کی تقاریر سننی ہیں تو اس کے لئے وہ مسجد کی بجلی استعمال نہیں کرے گا۔ ٹیپ ریکارڈ اور واک مین بیٹری سے چلائے اور اگرمسجد کی بجلی استعمال کرے تو اس کی رقم ادا کرے۔ ان تمام چیزوں میں دوسرے تمام عبادت گزاروں کے معمولات میں خلل نہیں آنا چاہیے۔

معتکف کو اگر سگریٹ نوشی کی عادت ہو تو کیا کرے؟

مسئلہ: اگر معتکف کو سگریٹ نوشی کی عادت ہے تو کوشش کرے کہ حتیٰ الا مکان اعتکاف کے دوران اس بری عادت کو چھوڑ دے مگر اگر بہت ضروری ہے تو بیت الخلاء میں آتے جاتے سگریٹ کو پی سکتا ہے مگر اس میں کہیں بھی سگریٹ کو پیتے ہوئے رکے گا نہیں، نہ اس کے لئے جان بوجھ کر تاخیر کرے گا۔

کیا معتکف مسجد میں اخبار پڑھ سکتا ہے؟

مسئلہ: آج کل کے دور میں عموماً اخباروں میں جانداروں کی تصاویر کثرت سے ہوتی ہیں اور بعض تصایر فحش اور لغو ہوتی ہیں لہٰذا اخباروں کے مطالعہ سے احتیاط ضروری ہے۔

کیا معتکف مسجد کی بالائی منزلوں اور چھت پر جا سکتا ہے؟

مسئلہ: اگر کسی مسجد کی عمارت کئی منزلہ ہے تو اس میں اس چیز کا خیال رکھا جائے گا کہ اگر سیڑھیاں احاطہ مسجد کے اندر ہی بنی ہوئی ہیں تو بلا تکلف معتکف مسجد کی تمام بالائی منزلوں اور چھت پر بھی جاسکتا ہے مگر مسجد کی چھت پر چڑھنا بلا ضرورت مکروہ ہے۔ لیکن اگر سیڑھیوں کا راستہ احاطہ مسجد سے باہر ہے تو اس صورت میں اگر معتکف مسجد کی بالائی منزل یا چھت پر جانے کے لئے مسجد سے باہر نکلے گا تو اس کا اعتکاف فاسد ہوجائے گا۔

کیا معتکف مسجد کے اندر کچی پیاز، مولی، کچا لہسن وغیرہ بد بودار چیزیں کھا سکتاہے؟

مسئلہ: مسجد کے اندر کچی پیاز، مولی، کچا لہسن وغیرہ بد بودار چیزیں کھانا ناجائز ہے ہر مسلمان کے لئے ضروری ہے کہ اگر ایسی چیزیں کھالے تو اچھی طرح منہ کو صاف کرلے۔ جب منہ سے بد بو جاتی رہے پھر مسجد میں داخل ہو۔

کیا معتکف مسجد میں شیو (داڑھی منڈوانا) کرسکتا ہے؟

مسئلہ: کم از کم ایک مٹھی داڑھی رکھنا ہر مسلمان پر واجب ہے۔ ایک مٹھی سے کم داڑھی کرنا حرام و ناجائز ہے۔ معتکف کا حالت اعتکاف میں یہ قبیح عمل کرنا انتہائی افسوسناک اور سخت حرام و ناجائز ہے۔

اگر معتکف غلطی سے احاطہ مسجد سے باہر نکل جائے تو کیا اعتکاف فاسد ہوجاتا ہے؟

مسئلہ: اگر معتکف غلطی سے احاطہ مسجد سے باہر جائے گا تو اس کا اعتکاف فاسد ہوجائے گا لہٰذا ضروری ہے کہ معتکف اعتکاف میں بیٹھنے سے پہلے احاطہ مسجد کے بارے میں اچھی طرح معلومات حاصل کرلے۔

شب قدر۔۔۔۔فضائل و معمولات

---

رمضان المبارک تما م مہینوں میں سب سے افضل ہے اور اس کی ایک رات جسے ’’لیلۃ القدر‘‘ کہا جاتا ہے ۔ یہ ایسی متبرک ہے کہ اس میں ایک رات کی عبادت ہزار ماہ کی عبادت سے بھی بہتر ہے۔ شب قدر کی اہمیت کا اندازہ اس بات سے لگایا جاسکتا ہے کہ اللہ تبارک و تعالیٰ نے اس کی فضیلت میں ایک سورۃ نازل فرمائی جس کا نام سورہ القدر ہے جس کا مفہوم ہے :

اِنَّاۤ اَنۡزَلۡنٰہُ فِیۡ لَیۡلَۃِ الۡقَدۡرِ ۚ﴿ۖ۱﴾ وَ مَاۤ اَدۡرٰىکَ مَا لَیۡلَۃُ الۡقَدۡرِ ؕ﴿۲﴾ لَیۡلَۃُ الۡقَدۡرِ ۬ۙ خَیۡرٌ مِّنۡ اَلۡفِ شَہۡرٍ ؕ﴿ؔ۳﴾ تَنَزَّلُ الۡمَلٰٓئِکَۃُ وَ الرُّوۡحُ فِیۡہَا بِاِذۡنِ رَبِّہِمۡ ۚ مِنۡ کُلِّ اَمۡرٍ ۙ﴿ۛ۴﴾ سَلٰمٌ ۟ۛ ہِیَ حَتّٰی مَطۡلَعِ الۡفَجۡرِ ٪﴿۵﴾(سورۃ القدر)

ترجمہ: بیشک ہم نے اسے (قرآن) اتارا شب قدر میں اور تم نے کیا جانا شب قدر کیا ہے، شب قدر ہزار مہینوں سے بہتر ہے ، اس میں فرشتے اور جبرائیل علیہ السلام اترتے ہیں، اپنے رب کے حکم سے ہر کام کے لئے وہ سلامتی ہے، صبح کے طلوع ہونے تک۔ 

حقیقت یہ ہے کہ شب قدر سر چشمہ برکات ہے ، اس رات خصوصیت کے ساتھ اللہ تبارک و تعالیٰ تجلیات و اکرام اس کی طرف متوجہ ہوتے ہیں۔ اس رات اللہ تعالیٰ کے خاص فرشتے عبادت کرنے والوں کے پاس آسمان سے تشریف لاتے ہیں جس کے باعث خداوندی میں ایک خاص قسم کا سرور پیدا ہوتا ہے۔

شب قدر کو یہ اعزاز کئی طرح سے حاصل ہے۔ قرآن کریم جو اللہ تعالیٰ کا آخری کلام ہے، وہ اس مقدس شب میں نازل ہوا ۔ سیدنا آدم علی نبینا علیہ السلام کا خمیر اس رات تیار ہوا ، اس رات میں جنت کے باغات لگائے گئے۔

شاہ عبدالزیز محدث دہلوی نے تفسیر عزیزی میں حضرت عثمان ابن ابی العاص رضی اللہ عنہ کے حوالے سے ایک روایت بیان فرمائی ہے ان کے ایک غلام نے انہیں یہ بتلایا کہ میں نے دریا کے اندر ایک عجیب و غریب اور بہت ہی حیران کن چیز دیکھی ۔ وہ یہ کہ سال میں ایک رات ایسی بھی آتی ہے کہ اس میں کھارے دریا کا پانی شیریں ہوجاتا ہے ۔ یہ سن کر حضرت عثمان بن ابی العاص نے اس سے یہ فرمایا جب وہ رات آئے تو مجھے تم اس کے بارے میں خبر دینا۔ میں دیکھوں تو سہی کہ وہ کو ن سی ایسی راتہے جس میں دریا کا پانی میٹھا ہوجاتا ہے ۔ چنانچہ جب یہ رات آئی رمضان کی ۔ ستائیسویں رات ۔ تو غلام نے اس کی خبر دی کہ آقا یہ ہے وہ رات جس میں پانی میٹھا ہوتا ہے ۔

شب قدر کے بارے میں یہ معلوم ہونا چاہیے کہ رمضان کے آخری عشرے میں طاق راتوں میں سے ایک رات ہے۔ جو شب قدر کہلاتی ہے اس کو متعین نہیں کیا گیا۔ یہ رمضا ن کی اکیس، تئیس، پچیس، ستائیس، انتیس ان پانچ طاق راتوں میں سے ایک ہوسکتی ہے جو ہر سال بدلتی رہتی ہے۔

اس رات کو مخفی رکھنے کی ایک حکمت یہ ہے کہ لوگ زیادہ سے زیادہ عبادت الٰہی میں مشغول ہوں۔ حضرت ابو ہریرہ رضی اللہ عنہ سے بخاری شریف میں ایک حدیث روایت ہے نبی کریم صلی اللہ تعالیٰ علیہ وسلم نے فرمایا کہ جو شخص شب قدر میں ایمان و ثواب کی نیت سے قیام کرے یعنی نوافل ادا کرے تو اس کے پہلے جتنے گناہ ہوتے ہیں، وہ سب بخش دئیے جاتے ہیں ۔ مطلب یہ ہے کہ جو بھی عبادت میں مصروف ہو گا ، ذکر و اذکار ، نوافل، تلاوت ِ قرآن ، تسبیح و تہلیل میں مشغول ہو ، نام و نمود نہ ہو محض رضائے الٰہی مقصود ہو تو اللہ اس کے گناہ معاف فرمادیتا ہے۔

حضرت انس بن مالک رضی اللہ عنہ سے مروی ہے انہوں نے فرمایا کہ جب رمضان کا مہینہ شروع ہوا تو حضور صلی اللہ تعالیٰ علیہ وسلم نے فرمایا کہ بے شک یہ مہینہ تم پر سایہ فگن ہوا ہے اور اس میں ایک رات ہزار مہینوں سے بہتر ہے، جو اس رات کی عبادت سے محروم رہا وہ تمام بھلائیوں سے محروم رہا، اور اس سب کی بھلائی سے وہی محروم ہو گا جو پورے طور پر محروم ہو۔

ہر مسلمان کو چاہیے کہ وہ شب قدر کو غفلت میں نہ گزارے، ذوق و شوق کے ساتھ ذکر و اذکار میں مصروف ہو کر اپنے گناہوںکی مغفرت چاہے اور اس رات کی نعمتوں میں سے محروم نہ رہے۔

شب قدر کی نشانیاں: امام شعرانی علیہ الرحمتہ نے شب قدر کی بعض نشانیاں بیان فرمائی ہیں، فرماتے ہیں کہ شب قدر بڑی روشن ہوتی ہے۔ موسم معتدل ہوتا ہے نہ ہی اس میں وہ ستارے ٹوٹتے ہیں جو شیاطین کو مارے جاتے ہیں۔

فوائد شب قدر: شب قدر کا فائدہ یہ ہے کہ اس میں عبادت پر کثرت سے ثواب عطا ہوتا ہے دعائیں قبول ہوتی ہیں۔ ہر مسلمان کو چاہیے کہ وہ اپنے لئے ، اپنے عزیز و اقارب اور جملہ مسلمانوں کے لئے دعا مانگے ۔

شب قدر کی دعا:

حضرت عائشہ رضی اللہ عنہا سے یہ دعا منقول ہے:

اَللّٰھُمَّ اِنَّکَ عَفُوّ’‘ کَرِیْمُ تُحِبُّ الْعَفَوَ فَاعْفُ عَنِّی یَا غَفُوْرُ یَا غَفُوْرُ یَا غَفُوْرُ

اور ایک روایت میں یہ دعا بھی منقول ہے :

اَسْتَغْفِرُ اللّٰہَ الَّذِی لَا اِلَہ اِلاَّ ھُوَ الْحَیُّ الْقَیُّومُ وَاَتُوْبُ اِلَیْہِ

مندرجہ بالا دعاؤں کے علاوہ جو دعائیں قرآن مجید میں ہیں، وہ بھی پڑھی جائیں تو اچھا ہے، مثلاً

رَبَّنَا اٰتِنَا فِی الدُّنْیَا حَسَنَۃً وَّ فِی الْاٰخِرَۃِ حَسَنَۃً وَّقِنَا عَذَابَ النَّارِ o

اسی طرح:

رَبِّ اجۡعَلۡنِیۡ مُقِیۡمَ الصَّلٰوۃِ وَ مِنۡ ذُرِّیَّتِیۡ ٭ۖ رَبَّنَا وَ تَقَبَّلۡ دُعَآءِ ﴿۴۰﴾ رَبَّنَا اغۡفِرۡ لِیۡ وَ لِوَالِدَیَّ وَ لِلۡمُؤۡمِنِیۡنَ یَوۡمَ یَقُوۡمُ الۡحِسَابُ ﴿٪۴۱﴾ (الابراہیم: 40-41)

شب قدر کے نوافل:

۱) ہر رکعت میں سورۃ فاتحہ پڑھنے کے بعد سورۃ التکاثر ایک بار اور سورۃ الا خلاص تین بار پڑھیں۔ اللہ تعالیٰ اس کی برکت سے موت کی سختی سے بچائے گا۔

۲) دو رکعت اسی طرح پڑھی جائیں کہ ہر رکعت میں سورۃ فاتحہ کے بعد سورۃ اخلاص سات مرتبہ پڑھے اور سلام کے بعد سات مرتبہ۔

اَسْتَغْفِرُ اللّٰہَ رَبِّیْ مِنْ کُلِّ ذَنْبِ وَّاَتُوْبُ اِلَیْہِ

خدانخواستہ نماز قضا ہوئی ہوں تو سب سے اچھا یہی ہے کہ اس رات قضا شدہ نماز پڑھیں۔ قضا نمازیں جلد از جلد پڑھنا ضروری ہیں۔ اللہ تعالیٰ عمل کی توفیق دے۔ آمین

صدقۂ فطر۔۔۔اہمیت ، مسائل و احکام

---

احادیث مبارکہ کی روشنی میں صدقہ فطر کی اہمیت

صحیح بخاری ومسلم میں عبداللہ بن عمر رضی اللہ عنہما سے مروی ہے کہ حضور صلی اللہ تعالیٰ علیہ وسلم نے زکوٰۃ فطر ایک صاع فرما یا جوہر غلام و آزاد، مرد و عورت، چھوٹے اور بڑے مسلمانوں پر مقرر کی۔ اور حکم یہ فرمایا کہ نماز کو جانے سے پیشتر ادا کریں۔

ترمذی شریف میں بروایت عمر وبن شعیب عن ابیہ عن جدہ کہ حضور صلی اللہ تعالیٰ علیہ وسلم نے ایک شخص کو بھیجا کہ مکہ کے کوچوں میں یہ اعلان کردے کہ صدقہ فطر واجب ہے۔

رسول اللہ صلی اللہ تعالیٰ علیہ وسلم نے فرمایا بندہ کا روزہ آسمان و زمین کے بیچ لٹکا رہتا ہے جب تک صدقہ فطر ادا نہ کرے۔

صدقہ فطر کے مسائل و احکام

صدقہ فطر واجب ہے :

مسئلہ: صدقہ فطر واجب ہے عمر بھر اس کا وقت ہے یعنی اگر ادا نہ کیا تو اب ادا کرے دے۔ ادا نہ کرنے سے ساقط نہیں ہوگا۔ نہ اب ادا کرنا قضا ہے بلکہ اب ادا ہی ادا ہے، اگرچہ سنت عید کی نماز سے پہلے ادا کرنا ہے۔

صدقہ فطر کب واجب ہوتا ہے؟

مسئلہ: عید کے دن صبح صادق شروع ہوتے ہی صدقہ فطر واجب ہوجاتا ہے ۔ لہٰذا جو شخص صبح صادق سے پہلے مر گیا یا فقیر ہو گیا تو اس پر صدقہ فطر واجب نہ ہوا۔

مسئلہ: صبح صادق شروع ہونے کے بعد جو بچہ پیدا ہوا یا جو کافر مسلمان ہوا یا جو فقیر غنی ہا، اس پر صدقہ فطر واجب نہ ہوا۔

مسئلہ: صبح صادق شروع ہونے سے پہلے کافر مسلمان ہو گیا یا بچہ پیدا ہوا یا جو فقیر تھا وہ غنی ہوگیا تو صدقہ فطر واجب ہے۔

صدقہ فطر کس پر واجب ہے؟

مسئلہ: صدقہ فطر ہر مسلمان آزاد مالک نصاب پر (جس کی نصاب حاجت اصلیہ کے علاوہ ہو) واجب ہے اس میں عاقل بالغ اور مال نامی ہونا شرط نہیں اور مال پر سال گذرنا بھی شرط نہیں۔

مسئلہ: مرد مالک نصاب پر اپنی طرف سے اور اپنے چھوٹے بچوں کی طرف سے صدقہ فطر واجب ہے، جب کہ بچہ خود کا مالک نہ ہو اور اگر بچہ نصاب کا مالک ہو تو اس کا صدقہ فطر اسی کے مال سے دیا جائے اور مجنون اولاد اگرچہ بالغ ہو جب کہ غنی نہ ہو تو اس کا صدقہ فطر اس کے باپ پر واجب ہے اور غنی ہو تو خود اس کے مال سے دیا جائے۔

کیا صدقہ فطر واجب ہونے کے لئے روزہ رکھنا شرط ہے؟

مسئلہ: صدقہ فطر واجب ہونے کے لئے روزہ رکھنا شرط نہیں ہے اگر کسی عذر، سفر، مرض، بڑھاپے کی وجہ سے یا معاذ اللہ بلا عذر روزہ نہ رکھا جب بھی واجب ہے۔

اگر بچہ کا باپ نہ ہو تو اس کی طرف سے صدقہ فطر کون ادا کرے؟

مسئلہ: باپ نہ ہو تو دادا باپ کی جگہ ہے یعنی اپنے فقیر و یتیم پوتے پوتی کی طرف سے اس پر صدقہ فطر دینا واجب ہے۔

کس کا صدقہ فطر مرد مالک نصاب پر واجب نہیں؟

مسئلہ: اپنی بیوی اور عاقل بالغ اولاد کا صدقہ فطر اس کے ذمہ نہیں، اگرچہ اپاہج ہوں، اگرچہ ان کا نفقہ اس کے ذمہ ہو۔

صدقہ فطر کی مقدار کتنی ہے؟

مسئلہ: صدقہ فطر کی مقدار یہ ہیے کہ گیہوں یا اس کا آٹا یا ستو آدھا صاع ، کھجور یا منقہ یا جو یا اس کا آٹا یا ستو ایک صاع۔

مسئلہ: گیہوں اور جو دینے سے ان کا آٹا دینا فضل ہے اور اس سے افضل یہ ہے کہ قیمت دے ۔ یا جو کی یا کھجور کی مگر گرانی میں خود ان چیزوں کا دینا قیمت دینے سے افضل ہے اور اگر خراب گیہوں یا جو کی قیمت دی تو اچھے کی قیمت سے جو کمی پڑے وہ پوری کرے۔

صاع کا وزن

مسئلہ: اعلیٰ درجے کی تحقیق اور احتیاط یہ ہے کہ صاع کا وزن چاندی کے پرانے روپے سے تین سو اکیاون روپے بھر اور آدھا صاع کا وزن ایک سو پچتھر روپے اٹھنی بھر اوپر ہے ۔ (فتاویٰ رضویہ)

مسئلہ: اور نئے وزن سے ایک صاع کا وزن چار کلو اور تقریباً چورانے گرام ہوتا ہے اور آدھا صاع کا وزن دو کلو اور تقریباً سینتالیس گرام ہوتا ہے۔

مسئلہ: صدقہ فطر کے مصارف وہی ہیں جو زکوٰۃ کے ہیں یعنی جن کو زکوٰۃ دے سکتے ہیں انہیں فطرہ بھی دے سکتے ہیں، سوا عامل کے کہ اس کے لئے زکوٰۃ ہے فطر نہیں۔

عید الفطر کا بیان

---

عید الفطر کے روز خوشی کا اظہار کرناسنت ہے لہٰذا دائے سنت کی نیت سے ہمیں بھی اللہ عزوجل کے فضل و رحمت پر ضرور اظہارِ مسرت کرنا چاہیے، کیونکہ اللہ تعالیٰ کے فضل و رحمت پر خوشی کرنے کی ترغیب تو ہمیں خود اللہ عزوجل کا سچا کلام دے رہا ہے۔ چنانچہ ارشاد ہوتا ہے :

قُلۡ بِفَضۡلِ اللّٰہِ وَ بِرَحۡمَتِہٖ فَبِذٰلِکَ فَلۡیَفۡرَحُوۡا ؕ (الیونس:58)

ترجمہ :تم فرماؤ ! اللہ (عزوجل) ہی کے فضل اور اسی کی رحمت، اسی پر چاہیے کہ خوشی کریں۔

ایک اور جگہ اللہ تبارک و تعالیٰ کا فرمان ہے کہ:

وَ لِتُکۡمِلُوا الۡعِدَّۃَ وَ لِتُکَبِّرُوا اللّٰہَ عَلٰی مَا ہَدٰىکُمۡ ّ(البقرۃ:185)

’’روزوں کی گنتی پوری کرو اور اللہ کی بڑائی بولو کہ اس نے تمہیں ہدایت فرمائی‘‘۔

احادیث مبارکہ کی روشنی میں عیدین کی اہمیت

ابو انس رضی اللہ عنہ سے راوی کہ حضور اقدس صلی اللہ تعالیٰ علیہ وسلم جب مدینہ منورہ میں تشریف لائے اس زمانہ میں اہل مدینہ سال میں دو دن (مہرگان و نوروز) خوشی کرتے تھے ۔ فرمایا یہ کیا دن ہیں، لوگوں نے عرض کیا ، جاہلیت میں ہم ان دنوں میں خوشی کرتے تھے ۔ فرمایا کہ اللہ تعالیٰ نے ان کے بدلے میں ان سے بہتر دو دن تمہیں دئیے ہیں عید الاضحی اور عید الفطر کے دن۔

ابن ماجہ ابو اسامہ رضی اللہ عنہ سے راوی کہ حضور صلی اللہ تعالیٰ علیہ وسلم فرماتے ہیں کہ جو عیدین کی راتوں میں قیام کرے ، اس کا دل نہ مرے گا جس دن لوگوں کے دل مریں گے ۔

اصبہانی معاذ بن جبل رضی اللہ عنہ سے راوی کہ فرماتے ہیں کہ جو پانچ راتوں میں شب بیداری کرلے اس کے لئے جنت واجب ہے۔ ذی الحجہ کی آٹھویں، نویں، دسویں راتیں اور عید الفطر کی رات اور شعبان کی پندرہویں رات یعنی شب برات۔

نماز عید کی احکام و مسائل

عیدین کی نماز کس پر واجب ہے؟

مسئلہ: عیدین کی نماز واجب ہے، مگر سب پر نہیں، بلکہ انہیں پر جن پر جمعہ واجب ہے۔

نمازِ عیدین اور جمعہ میں کیا فرق ہے؟

مسئلہ: عیدین کی نماز کی وہی شرطیں ہیں جو جمعہ کے لئے ہیں، صرف اتنا فرق ہے کہ جمعہ میں خطبہ شرط ہے اور عیدین میں سنت، اگر جمعہ میں خطبہ نہ پڑھا تو جمعہ نہ ہوا اور عیدین میں نہ پڑھا تو نماز ہوگئی، مگر برا کیا، دوسرا فرق یہ ہے کہ جمعہ کا خطبہ قبل نماز اور عیدین کا بعد نماز۔ اگر پہلے پڑھ لیا تو برا کیا، مگر نماز ہوگئی، لوٹائی نہیں جائے گی اور خطبہ کا بھی اعادہ نہیں۔ اور عیدین میں نہ اذان ہے نہ اقامت۔

صحیح مسلم میں ہے جابر بن سمرہ رضی اللہ عنہ کہتے ہیں کہ میں نے حضور صلی اللہ تعالیٰ علیہ وسلم کے ساتھ عید کی نماز پڑھی ، ایک دو مرتبہ نہیں (بلکہ بارہا) نہ اذان ہوئی نہ اقامت۔

عید کی نماز بلا عذر چھوڑنا کیسا؟

مسئلہ: بلاوجہ عید کی نماز چھوڑنا گمراہی و بدعت ہے۔

نمازِ عید کس وقت پڑھیں ؟

مسئلہ: نمازِ عید کا وقت بقدر ایک نیزہ آفتاب بلند ہونے سے ضحوی کبریٰ یعنی نصف النہار شرعی تک ہے، مگر عید الفطر میں دیر کرنا اور عید الضحیٰ میں جلدی پڑھ لینا مستحب ہے اور سلام پھیرنے سے پہلے زوال ہو گیا تو نماز جاتی رہی ۔ (درمختار وغیرہ) زوال سے مراد نصف النہا ر شرعی ہے ۔

عید کی سنتیں اور آداب

عید کے دن مندرجہ ذیل کام سنت ہیں ۔

۱)حجامت بنوانا ۲)ناخن ترشوانا ۳)غسل کرنا ۴)مسواک کرنا

۵)اچھے کپڑے پہننا، نئے ہوں تو نئے ورنہ دھلے ہوئے۔

۶)خوشبو لگانا (جب بھی خوشبو لگائیں تو پاک عطر لگائیں، اسپرٹ سینٹ نہ لگائیں کہ یہ ناپاک ہوتا ہے)

۷)انگوٹھی پہننا (جب کبھی انگوٹھی پہنیں تو اس بات کا خاص خیال رکھیں کہ صرف ساڑھے چار ماشہ سے کم وزن کی چاندی کی ایک ہی انگوٹھی پہنیں، ایک سے زیادہ نہ پہنیں اور اس ایک انگوٹھی میں بھی نگینہ ایک ہی ہو۔ ایک سے زیادہ نگینے نہ ہوں اور بغیر نگینے کی بھی نہ پہنیں۔ نگینے کے وزن کی کوئی قید نہیں، چاندی یا کسی اور دھات کا چھلایا چاندی کے بیان کردہ وزن وغیرہ کے علاوہ کسی بھی دھات کی انگوٹھی یا چھلا نہیں پہن سکتے)

۸)نمازِ فجر مسجد محلہ میں پڑھنا۔

۹)عید الفطر کی نماز کو جانے سے پہلے چند کھجوریں کھالینا، تین، پانچ، سات یا کم و بیش مگر طاق ہوں۔ کھجوریں نہ ہوں تو کوئی میٹھی چیز کھالیں اگر نماز سے پہلے کچھ بھی نہ کھایا تو گناہ نہ ہوا ۔ مگر عشاء تک نہ کھایا تو عتاب کیا جائے گا۔ عید الا ضحی میں مستحب یہ ہے کہ نماز سے پہلے کچھ نہ کھائے۔ چاہے قربانی کرے یا نہ کرے اور اگر کھالیا تو کراہت بھی نہیں۔

۱۰)نمازِ عید، عید گاہ میں اد اکرنا

۱۱) عید گا ہ پیدل جانا

۱۲)سواری پر بھی جانے پر حرج نہیں، مگر جس کو پیدل جانے پر قدرت ہو ، اس کے لئے پیدل جانا افضل ہے اور واپسی پر سواری پر آنے میں حرج نہیں۔

۱۳)نمازِ عید کے لئے ایک راستے سے جانا اور دوسرے راستے سے واپس آنا۔

حضرت سیدنا ابوہریرہ رضی اللہ عنہ سے روایت ہے کہ تاجدارِ مدینہ صلی اللہ تعالیٰ علیہ وسلم عید کو نمازِ عید کے لئے ایک راستے سے تشریف لے جاتے اور دوسرے راستے سے واپس تشریف لاتے۔

۱۴)عید کی نماز سے پہلے صدقہ فطر ادا کرنا (افضل تو یہی ہے ، مگر عید کی نماز سے قبل نہ دے سکے تو بعد میں دے دیں)

۱۵)خوشی ظاہر کرنا

۱۶)کثرت سے صدقہ دینا

۱۷)عید گاہ کو اطمینان و وقار اور نیچی نگاہ کئے جانا

۱۸)ایک دوسرے کو مبارک باد دینا

۱۹)بعدِنماز عید مصافحہ یعنی ہاتھ ملانا اور معانقہ یعنی بغلگیر ہونا ، جیسا کہ عموماً مسلمانوں میں رائج ہے، بہتر ہے کہ اس میں اظہارِ مسرت ہو۔

۲۰)عید الفطر کی نماز کے لئے جاتے ہوئے راستے میں آہستہ سے تکبیر کہیں اور نمازِ عید الضحیٰ کے لئے

جاتے ہوئے راستے میں بلند آواز میں تکبیر کہیں۔ تکبیر یہ ہے:

اَللّٰہُ اَکْبَرُ اَللّٰہُ اَکْبَرُ لَا اِلَہ اَلاَّ اللّٰہُ وَاللّٰہُ اَکْبَرُ اَللّٰہُ اَکْبَرُ وَلِلّٰہِ الْحَمْدُ o

ترجمہ: ’’اللہ عزوجل بہت بڑا ہے ، اللہ عزوجل بہت بڑا ہے ،اللہ عزوجل کے سوا کوئی عبادت کے لائق نہیں اور اللہ عزوجل بہت بڑا ہے اور اللہ عزوجل ہی کے لئے تمام تعریفیں ہیں‘‘۔

نمازِ عید کا طریقہ

نمازِ عید کا طریقہ یہ ہے کہ دو رکعت واجب عید الفطر یا عید الاضحی کی نیت کرکے کانوں تک ہاتھ اٹھائے اور اللہ اکبر کہہ کر ہاتھ باندھ لے۔ پھر ثناء پڑھے۔ پھر کانوں تک ہاتھ اٹھائے اور اللہ اکبر کہتا ہوا ہاتھ چھوڑدے ۔ پھر کانوں تک ہاتھ اٹھائے اور اللہ اکبر کہتا ہوا ہاتھ چھوڑ دے۔ پھر ہاتھ اٹھائے اور اللہ اکبر کہہ کر ہاتھ باندھ لے ۔ اس کو یوں یاد رکھے کہ جہاں تکبیر کے بعد کچھ پڑھنا ہے وہاں ہاتھ باندھ لئے جائیں اور جہاں پڑھنا نہیں ہے وہاں ہاتھ چھوڑ دئیے جائیں۔ پھر امام اعوذ باللہ اور بسم اللہ پڑھ کر جہر کے ساتھ الحمد اور سورت پڑھے، پھر رکوع کرے اور دوسرے رکعت میں پہلے الحمد و سورت پڑھے پھر تین بار کانوں تک ہاتھ لے جا کر اللہ اکبر کہے اور ہاتھ نہ باندھے اور چوتھی باربغیر ہاتھ اٹھائے اللہ اکبر کہتا ہوا رکوع میں جائے ۔

اس سے معلوم ہوا کہ عیدین میں زائد تکبیریں چھ ہوئیں، تین پہلی رکعت میں قرأت سے پہلے اور تکبیر تحریمہ کے بعد اور تین دوسری رکعت میں قرأت کے بعد اور رکوع سے پہلے اور ان چھ تکبیروں میں ہاتھ اٹھائے جائیں گے اور ہر دو تکبیروں کے درمیان میں تین تسبیح کے برابر سکتہ کرے۔

بعدِ نماز عید مصافحہ و معانقہ کرے، جیسا کہ عموماً مسلمانوں میں رائج ہے کہ اس میں اظہار مسرت ہے۔

عید کا تحفہ

حضور اکرم صلی اللہ تعالیٰ علیہ وسلم نے فرمایا ہے کہ جو شخص عید کے دن 300 مرتبہ

سُبْحَانَ اللّٰہِ وَبِحَمْدِہٖ

پڑھے اور فوت شدہ مسلمانوں کی اراوح کو اس کا ثواب ہدیہ کرے ۔ تو ہر مسلمان کی قبر میں ایک ہزار انوار داخل ہوتے ہیں۔ اور جب وہ پڑھنے والا خود مرے گا تو اللہ عزوجل اس کی قبر میں بھی ایک ہزار انوار داخل فرمائے گا۔