تری مدح خواں ہر زباں غوثِ اعظم
از: مداح حبیب علامہ جمیل الرحمان قادری رضوی
تری مدح خواں ہر زباں غوثِ اعظم
ترا نام مومن کی جاں غوثِ اعظم
پناہِ غریباں تری ذات والا
ترا گھر ہے دَارُالاَماں غوثِ اعظم
زمانہ نہ کیونکر ہو مہمان کہ تم نے
بچھایا ہے رحمت کا خواں غوثِ اعظم
تری مجلس وَعظ میں آتے اکثر
عرب سے شہِ مرسلاں غوثِ اعظم
جسے شک ہو وہ خضر سے پوچھ دیکھے
تری مجلسوں کا سماں غوثِ اعظم
نہ لے بھول کر نام بلبل چمن کا
جو دیکھے ترا گل ستاں غوثِ اعظم
ہے بزم حسین و حسن تجھ سے روشن
تو ہے نور کا شمع داں غوثِ اعظم
ترے جد اَمجد ہیں نورِ الٰہی
ہے نوری تیرا خانداں غوثِ اعظم
علوم و فیوض شہنشاہِ طیبہ
ہیں سینے میں تیرے نہاں غوثِ اعظم
ترے سامنے حالتِ دل ہے روشن
کروں زور سے کیوں فغاں غوثِ اعظم
تمہاری وِلایت سیادت کرم کا
ہوا شور تا لامکاں غوثِ اعظم
ترے وَعظ میں آکے شاہِ عرب نے
بڑھائی تری عز و شاں غوثِ اعظم
ہوئے دیکھ کر تجھ کو کافر مسلماں
بنے سنگدل موم ساں غوثِ اعظم
قلوبِ خلائق کی بابِ جناں کی
ملی ہیں تجھے کنجیاں غوثِ اعظم
بخارا و اَجمیر و مارِہرہ کلیر
یہ سب ہیں تری ندّیاں غوثِ اعظم
کریں جبہ سائی جہاں تاج والے
وہ ہے آپ کا آستاں غوثِ اعظم
مٹائے ترے دَر پہ جو اپنی ہستی
رہے اس کا نام و نشاں غوثِ اعظم
ملے اب تو گلزارِ بغداد مجھ کو
میں بلبل ہوں بے آشیاں غوثِ اعظم
ملے گی ہمیں تیرے دامن کے نیچے
دوعالم میں امن و اماں غوثِ اعظم
دوعالم میں ہے کون حامی ہمارا
یہاں غوثِ اعظم وہاں غوثِ اعظم
ذَرا صدقِ دِل سے پکارو تو اُن کو
ابھی جلوہ گر ہوں یہاں غوثِ اعظم
نہ ہو مبتلا وہ کبھی رنج و غم میں
کرے جس کو تو شادماں غوثِ اعظم
اگر ذِکر میں تیرے گزرے تو بہتر
یہ تھوڑی سی عمرِ رَواں غوثِ اعظم
ملے رَنج و اَفکار سے مجھ کو مہلت
کہ ہوں آپ کا مَدح خواں غوثِ اعظم
مرے دم میں جب تک رہے دم رہوں میں
ترے ذِکر سے تر زباں غوثِ اعظم
دَمِ صور مرقد سے کہتا اُٹھوں گا
وہاں لے چلو ہیں جہاں غوثِ اعظم
ہمارے قصور و خطا بخشوا کر
دِلائیں قصورِ جناں غوثِ اعظم
کیا مرغ سوکھی ہوئی ہڈیوں کو
یہ رکھتے ہیں تاب و تواں غوثِ اعظم
جمیلؔ اب ہو ساکت مقامِ اَدَب ہے
کہاں تیرا منہ اور کہاں غوثِ اعظم